काठमाडौँ । नेपालमा बुधबार २५६९ जनामा कोरोना संक्रमण पुष्टि भएको छ । यससँगै कोरोना संक्रमितको कुल संख्या दुई लाख २ हजार ३२९ पुगेको छ ।

स्वास्थ्य तथा जनसंख्या मन्त्रालयले अद्यावधिक गरेको विवरणअनुसार मंगलबार थप २६ सहित एक हजार १७४ जनाले ज्यान गुमाएका छन् ।

पछिल्लो २४ घन्टामा थप १६६६ जना उपचारपछि निको भएर घर फर्किएका छन् । योसँगै निको भएर घर फर्किनेको कुल संख्या एक लाख ६२ हजार २४३ पुगेको छ । जुन कुल संक्रमितको ८०.१९ प्रतिशत हो । 

काठमाडौँ उपत्यकामा थप १२६१ जना संक्रमित थपिएका छन् । काठमाडौँका ९७६, ललितपुरका २०४ र भक्तपुरका ८१ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।    

हालसम्म उपत्यकाभित्र संक्रमित हुनेको संख्या ९२ हजार ७३१ पुगेको छ । जसमा काठमाडौँमा कुल ७५ हजार ३१७, ललितपुरमा १० हजार ६७५ र भक्तपुरमा ६ हजार ७३९ जना रहेका छन् ।   

मोरङ, सिरहा, ललितपुर, काठमाडौँ, चितवन, भक्तपुर र रुपन्देहीमा पाँच सय बढी सक्रिय सङ्क्रमित रहेका छन् । ७७ जिल्लामध्ये कोभिड–१९ शून्य भएको जिल्ला मनाङ रहेको छ । 

स्वास्थ्य मन्त्रालयको विवरणअनुसार पछिल्लो २४ घन्टामा देशभरका प्रयोगशालामा थप १० हजार ८१ जनासहित हालसम्म १५ लाख ७४ हजार २९५ जनाको पिसिआर विधिबाट परीक्षण गरिएको छ । हाल देशभरका क्वारेन्टाइनमा ११०९ जना र आइसोलेसनमा ३८ हजार ९१२ जना रहेका छन् ।

देशभर २८ हजार ३९३ जना होम आइसोलेसनमा रहेका छन् संस्थागत आइसोलेसनमा रहेकामध्ये देशभर ९५ जनाको भेन्टिलेटरमा उपचार भइरहेको छ भने ३८२ जनाको आइसियूमा उपचार भइरहेको मन्त्रालयले जनाएको छ ।