काठमाडौँ । काठमाडौँ उपत्यकामा स्वास्थ्यका न्यूनतम मापदण्ड प्रयोग नगर्दा कोरोना भाइरसको सङ्क्रमण बढेको पाइएको छ । जनस्वास्थ्यमा मापदण्डविना सभा, गोष्ठी र भीडभाड गरिएकाले सङ्क्रमण बढेको हो ।
स्वास्थ्य तथा जनसङ्ख्या मन्त्रालयका प्रवक्ता डा जागेश्वर गौतमले सोमबार आयोजित पत्रकार सम्मेलनमा हरेक नागरिकले घर बाहिर निस्कँदा मास्क लगाउने, दुई मिटरको दूरी कायम राख्ने र पटकपटक साबुनपानीले हात धुने वा स्यानिटाइजर प्रयोग गर्नुपर्नेमा जोड दिएका छन् ।
सोमबार देशभर २४४० सङ्क्रमितमध्ये काठमाडौँ उपत्यकामा मात्र १५३१ जनामा संक्रमण पुष्टि भएको छ । नेपाल भारत सीमामा मानिसको आवतजावतका कारणले पनि सङ्क्रमण बढेको उनको दाबी थियो ।
“खुला सीमा भएका कारण मानिस सीधै काठमाडौँ आए । आएका मानिस पनि १४ दिनसम्म क्वारेन्टाइनमा नबस्दा सङ्क्रमण बढेको हो”, उनले भने, “हामीले बाहिरबाट आइसकेका मानिसलाई अनिवार्य १४ दिन क्वारेन्टाइनमा बस्न भनेका थियौँ । त्यो पनि पालना गरिएन । आज सङ्क्रमण बढ्यो भनेर चिन्ता गर्नुभन्दा सङ्क्रमण नबढ्न के गर्न सकिन्छ भनेर सोच्नुपर्छ ।”
उनका अनुसार नेपालमा हाल आइसोलेसन २० हजार ७६५, सघन उपचार कक्ष दुई हजार ६०० र भेन्टिलेर ९०० छन् । अझै ११० भेन्टिलेटर आउने क्रममा छ । उनले संक्रमण बढ्न नदिन राजधानीबाहिरबाट आएका मानिसलाई अनिवार्य १४ दिन क्वारेन्टाइनमा बसिदिन आग्रह गरेका छन् ।
काठमाडौँ उपत्यकामा सोमबार थप १५३१ जना संक्रमितमध्ये काठमाडौँका ११७८, ललितपुरका २५९ र भक्तपुरका १०३ जनामा संक्रमण पुष्टि भएको हो । हालसम्म उपत्यकाभित्र संक्रमित हुनेको संख्या ३० हजार १९९ पुगेको छ । जसमा काठमाडौँमा कुल २२ हजार ७३८, ललितपुरमा ३ हजार ४२५ र भक्तपुरमा २ हजार ४६९ जना रहेका छन् ।
प्रतिक्रिया