नेपालीहरुको महान् चाड बडादसैँको शुभअवसरमा पूर्वी चितवनको पर्यटकीय नगरी सौराहाका बालगायक प्रिन्स सिलवालले नयाँ गीत सार्वजनिक गरेका छन् ।
सिलवालले बडादसैँलाई लक्षित गरी नयाँ गीत ‘दसैँ मनाउने हो, घुम्दै रमाउने हो’ बोलको गीत बजारमा ल्याएका हुन् । दसैँको अवसरमा बालबालिकालाई रमाइलो होस् भन्ने उद्देश्यले गीत बजारमा ल्याएको उनका बुबा रमेश सिलवालले हिमालय खबरलाई बताए ।
रमेश पाठकको शब्द रहेको सो गीतमा नरेन्द्र वियोगीले संगीत संयोजन गरेका छन् । बालगायक प्रिन्सलाई बालगायिका दिप्सी भट्टले स्वरमा साथ दिएकी छिन् ।
प्रिन्सले यसअघि ‘न मानामा नापिन्छ माया’ बोलको गीत रेकर्ड गरेका छन् । तर, बजारमा आउन बाँकी रहेको बुबा सिलवालले बताए ।
दसैँको अवसर भएकाले आफूले उनको दसैँ मनाउने हो बोलको गीतलाई प्राथमिकता दिएर बजारमा ल्याएकोसंगीतकार रमेश पाठकले बताए।
सो गीतको निर्देशन बुद्ध लामाले गरेका छन् । उक्त गीतको भिडियो काठमाडौँको स्वयम्भु र फुटुङ आसपासका क्षेत्रमा दिपेन्द्र भट्टले छायांकन गरेका हुन् ।
यसैबीच, राष्ट्रिय संगीतकर्मी संघको आयोजना एवम् शान्ति सन्देश बचत तथा ऋण सहकारी संस्थाको सहआयोजनामा बडादसैँ शुभकामना तथा सम्मान साँझ २०७५ बाट बालगायक प्रिन्स सम्मानित भएका छन् । कृषि मन्त्री चक्रपाणि खनालले एक समारोहबीच उनलाई सम्मान गरेका हुन् ।
प्रतिक्रिया