नयाँ दिल्ली । भारतमा विगत २४ घन्टामा अहिलेसम्मकै धेरै ३८ हजार ९०२ व्यक्तिमा कोभिड–१९ सङ्क्रमण पुष्टि भएको संघीय स्वास्थ्य मन्त्रालय तथा परिवार कल्याण मन्त्रालयले आइतबार जानकारी गराएको छ । 

 

योसँगै भारतमा कोभिड–१९ सङ्क्रमितको कुल सङ्ख्या १० लाख ९३ हजार ४५० पुगेको मन्त्रालयको तथ्याङ्कमा उल्लेख छ ।

 

विगत २४ घन्टामा कोभिड–१९ सङ्क्रमित ६०० बिरामीको मृत्यु भएसँगै यो महामारीका कारण भारतमा मृत्यु हुनेको सङ्ख्या २७ हजार ४२८ पुगेको मन्त्रालयले पुष्टि गरेको छ ।

 

भारतमा आइतबार रातिसम्म निको भई घर फर्किने कोभिड–१९ सङ्क्रमित बिरामीको सङ्ख्या छ लाख ९३ हजार ४५० पुगेको छ भने अझै तीन लाख ८५ हजार २५७ व्यक्ति सङ्क्रमित रहेका छन् ।

 

सबैभन्दा बढी प्रभावित भारतीय राज्य महाराष्ट्रमा तीन लाख ९३७ जनामा कोरोनाभाइरस सङ्क्रमण पुष्टि भएको छ ।

 

भारतीय चिकित्सा अनुसन्धान परिषद् (आईसीएमआर) का अनुसार जुलाई १८ सम्म भारतमा कोभिड–१९ सङ्क्रमण परीक्षणका लागि एक करोड ३४ लाख ३३ हजार ७४२ नमूना परीक्षण गरिएको छ भने यसमध्ये तीन लाख ६१ हजार २४ व्यक्तिको कोभिड–१९ सङ्क्रमण पुष्टि भएको छ । एएनआई