हिमालयखबर संबाददादा-  

टेक्सस (अमेरिका) ।  माछा मार्नका लागि तालमा पस्दा विहीबारदेखि वेपत्ता भएका नेपालीभाषी दुई युवाको शव गोताखोरले निकालेका छन् ।

 

फोर्टवर्थबाट ८०/ ८५  माइल पश्चिममा रहेको पसमि किङगडम लेकमा उनीहरु वेपत्ता भएका थिए । माछा मार्ने क्रममा मोबाइल फोन खसेपछि निकाल्ने प्रयासमा उनीहरु डुबेका थिए ।

 

तीनजना तालमा पसेकोमा भियतनामीमुलका युवक भने पौडिएर निस्कन सफल भएका थिए । डुबेका दुईमध्य भुटानीमुलका नेपालीभाषी त्रिशरण खत्रीको शव अस्टिनबाट आएका गोताखोरले शनिबार निकालेका थिए । नेपालीमुलका हिकारु गौतमको शव भने आइतबार अपरान्हमात्र फेला परेको छ । 

 

स्थानीय टिभी च्यानल फक्स–फोरले जनाए अनुसार गोताखोर (गेम वार्डन क्रु) टीमले अक्सिजन सहित तीनदिनदेखि निरन्तर खोजी जारी राखेका थिए ।  

 

वेपत्ता भएका युवकमध्यका नेपालीयुवा हिकारु गौतम ड्यालस फोर्टवर्थमा सामाजीक कृयाकलापमा निकै सकृय सरिता चौलागाईका छोरा हुन् । सरिता नेपालका पूर्ब मन्त्री कमल चौलागाईकी छोरी हुन् । उनी फोर्टवर्थ केलरमा बसोबास गरेर व्यापारमा संलग्न छिन् । गत वर्षमात्र हाइस्कुलबाट ग्राजुएट भएका हिकारु हाल युनिभर्सिटी अफ टेक्सस आर्लिङ्गनमा अध्ययनरत थिए । सन् २००१ को जुलाईमा उनी जन्मिएका हुन् । 

 

माछा मार्न भनेर विहीबार अपरान्ह घरबाट निस्किएका उनीहरु तीनैजना सहपाठी हुन् । उनीहरु एकै उमेर समूहका रहेको बताइएको छ । 

 

डुबेर वेपत्ता भएपछि खोजीकार्य गर्न नेपाली समुदायका अगुवाहरु समेत निकै सकृय थिए । उनीहरुले पीडित परिवारप्रति सहानुभूति र समवेदना व्यक्त गरेका छन् ।

 

हिमालयखबर परिवार यो दुखद घडीमा मृतक दुई होनहार युवकहरुप्रति हार्दिक श्रद्धाञ्जली व्यक्त गर्दै शोक सन्तप्त परिवारप्रति गहिरो समवेदना व्यक्त गर्दछ ।