जेनेभा ।  विश्वभर कोभिड–१९ का कारण मृत्यु हुनेको सङ्ख्या पाँच लाख ४१ हजार ७५३ पुगेको विश्व स्वास्थ्य संगठनले जनाएको छ भने सङ्क्रमितको सङ्ख्या एक करोड १८ लाख नजिक पुगेको छ । 

 

तर, जोन हकिन्स विश्वविद्यालयका अनुसार विश्वभर सङ्क्रमितको सङ्ख्या एक करोड १७ लाख रहेको छ भने मृत्यु हुनेको सङ्ख्या पाँच लाख ४१ हजारभन्दा बढी पुगेको छ । त्यस्तै निको हुनेको सङ्ख्या ६७ लाखभन्दा बढी रहेको छ ।

 

विश्वमा सबैभन्दा बढी सङ्क्रमितको सङ्ख्या संयुक्त राज्य अमेरिकामा रहेको छ भने ब्राजिल दोस्रो स्थानमा रहेको छ । सङ्क्रमणका हिसाबले भारत विश्वको बढी प्रभावित मुलुकहरूमध्ये तेस्रो स्थानमा रहेको छ । 

 

यद्यपि मृत्यु सङ्ख्या भने अमेरिका, ब्राजिलपछि बेलायतमा बढी रहेको छ । बेलायतमा मङ्गलबारसम्म कुल ४४ हजार २३६ को मृत्यु भएको छ भने सङ्क्रमितको सङ्ख्या भने दुई लाख ८५ हजार ७६८ मात्रै रहेको छ । 

 

सङ्क्रमण र मृत्युका हिसाबले हेर्दा विश्वमा बढी प्रभावित अन्य मुलुकहरूमा इटली, स्पेन, रूस, पेरू, फ्रान्स, मेक्सिको र जर्मनीलगायतका मुलुकहरू रहेका छन् ।  

 

विश्व स्वास्थ्य सङ्गठनले विश्वमा कोरोना भाइरस सङ्क्रमणका कारण महामारी को अवस्था आएको घोषणा गत मार्च ११ मा गरेको थियो । सर्वप्रथम कोरोना भाइरस सङ्क्रमणको पुष्टि चीनको वुहान सहरमा भएको थियो । 

 

ब्राजिलमा ६५ हजारभन्दा बढीको मृत्यु 

 

ब्राजिलमा कोरोना भाइरस सङ्क्रमणका कारण मृत्यु हुनेको सङ्ख्या मङ्गलबार ६५ हजार ६३१ पुगेको ब्राजिलको स्वास्थ्य मन्त्रालयले एक विज्ञप्ति जारी गरी पुष्टि गरेको छ ।

 

मन्त्रालयका अनुसार विगत २४ घन्टामा ब्राजिलमा महामारीका कारण मृत्यु हुनेको सङ्ख्या ६५६ रहेको छ ।

 

त्यस्तै विगत २४ घन्टामा ब्राजिलमा कोभिड–१९ सङ्क्रमितको सङ्ख्या थप २१ हजार ४८६ ले वृद्धि भएको छ । अहिलेसम्म ब्राजिलमा १६ लाख २६ हजार ७१ व्यक्ति कोभिड–१९ सङ्क्रमित भएका छन् । सोमबार ब्राजिलमा नयाँ सङ्क्रमितको सङ्ख्या २६ हजार रहेको थियो भने मृत्यु सङ्ख्या ६०२ रहेको थियो ।

 

ब्राजिलमा अहिलेसम्म कोभिड–१९ सङ्क्रमण उपचारपछि निको हुनेको सङ्ख्या १० लाख ७२ हजार २२९ रहेको पनि मन्त्रालयको तथ्याङ्कमा उल्लेख गरिएको छ । एएफपी