नयाँ दिल्ली । भारतका स्वास्थ्यमन्त्री हर्षवर्धनले भारतका कोभिड १९ का सङ्क्रमितहरुमा निको हुने प्रतिशत ५८ रहेको जानकारी दिएका छन् । उनले भनेका छन्– यहाँका कोभिड १९ का सङ्क्रमितहरुमध्ये ५८ प्रतिशतलाई निको भएको छ । 

 

भारतमा शनिबारसम्ममा पाँच लाख २८ हजारलाई कोभिड १९ को सङ्क्रमण भएको र तीमध्ये कम्तीमा पनि तीन लाख मानिस निको भएर घर फर्किएका छन् । उनका अनुसार शनिबारसम्ममा तीन लाख ९ हजार २५९ सङ्क्रमितलाई निको भएको छ । अरु पनि धेरै जना यसबाट निको भएका र घरजाने अन्तिम तयारीमा रहेका जानकारी पनि उनले दिए ।

 

भारतका विभिन्न आठ राज्यका ती नागरिक निको भएर घर फर्किएका छन् । त्यसैगरी भारतमा निधन भएकाहरुमा ८७ प्रतिशत जति तिनै राज्यका नागरिक रहेका पनि उनले बताए । त्यसैगरी उनले भारतमा सङ्क्रमितहरुको मृत्यु दर तीन प्रतिशतमात्र रहेको बताएका छन् । 

 

उनले यहाँ मृत्यु दर जम्मा तीन प्रतिशत छ र यो निकै नै कम हो उनले भनेका छन् । यहाँ पहिलेको तुलनामा दोब्बर हुने दर पनि बढेको उनले बताए । उनले १९ दिनमा यहाँका सङ्क्रमितको संख्या दोब्बर हुने गरेको जानकारी दिए । 

 

यहाँ कोरोना सङ्क्रमणको परीक्षण गर्ने संख्या पनि बढेको जानकारी उनले दिए । यहाँका १ हजार २० प्रयोगशालामा शुक्रबारमात्र २ लाख ३० हजार जनाको परीक्षण गरिएको उनले जानकारी दिए । उनले धरैभन्दा धेरै जनाको कोरोना परीक्षणको व्यवस्था सरकारले मिलाएको जानकारी पनि गराए । 

 

भारतमा शनिबारसम्म कोरोना सङ्क्रमणबाट पाँच लाखभन्दा बढी मानिस सङ्क्रमित भएका छन् । त्यसैगरी सो सङ्क्रमणबाट १६ हजार जनाभन्दा बढीको ज्यान गएको छ । यहाँ गएको २४ घन्टायतामात्र १८ हजारभन्दा बढी नागरिक सङ्क्रमित भएको भेटिएका छन् । यो एकैदिन सङ्क्रमित भएकाहरुमा सबैभन्दा बढी संख्या हो ।   

 

यहाँ गएका केही दिनयतादेखि हरेक दिन कम्तीमा पनि १५ हजार जना सङ्क्रमित हुने गरेका छन् । पछिल्लो समयमा यहाँ थपिएका बिरामीहरुका कारण भारतको अवस्था भयावह हुने देखिएको पनि बताइएको छ ।

 

स्वास्थ्यमन्त्री हर्षवर्धनले शनिबार कोरोना भाइरसको उपचारका लागि समन्वय गर्नुपर्ने भन्दै भारतका केन्द्रीय सरकार मन्त्रीहरुसँग भर्चुअल बैठक गरेका थिए । त्यसक्रममा उनले भारत सरकारले सङ्क्रमणको नियन्त्रणका लागि सक्दो प्रयासहरु गरिरहेको बताएका थिए । एएनआई