नयाँ दिल्ली । भारतमा कोरोना भाइरसबाट संक्रमितको कुल संख्या शनिबार पाँच लाख नाघेको छ । भारतमा दैनिक हजारौँको संख्यामा नयाँ संक्रमितहरु थपिँदै गएकाले कुल संक्रमितको संख्या पाँच लाख १८ हजार ९३६ पुगेको हो ।

 

सरकारी अधिकारीहरुले शनिबार दिएको जानकारीअनुसार पछिल्लो २४ घन्टामा मात्रै १८ हजारभन्दा बढी संक्रमित भएका छन् । भारतमा शनिबार सार्वजनिक गरिएको तथ्यांकअनुसार एकैदिनमा १८ हजार ५५२ जना संक्रमित भएका हुन् ।

 

गत जुनदेखि मात्रै भारतमा तीन लाख १८ हजार नयाँ संक्रमित थपिएको केन्द्रीय स्वास्थ्य तथा परिवार कल्याण मन्त्रालयले जनाएको छ ।

 

देशभरी अहिले दुई लाख १११ जना संक्रमित अवस्थामै रहेका छन् भने संक्रमणमुक्त हुनेहरुको संख्या तीन लाख २ हजार ९४५ पुगेको छ ।   

 

भारतमा कोरोना भाइरसबाट संक्रमित भएर अहिलेसम्म मृत्यु भएकाहरुको कुल संख्या १५ हजार ८८० पुगेको स्वास्थ्य अधिकारीहरुले जनाएका छन् । 

 

कोरोना भाइरसबाट सबैभन्दा धेरै महाराष्ट्र प्रदेश प्रभावित भएको छ । सो प्रदेशमा कोरोना भाइरसबाट संक्रमित भएका र मृत्यु भएकाहरुको संख्या सबैभन्दा धेरै रहेको छ ।

 

महाराष्ट्रमा मात्रै अहिलेसम्म एक लाख ५२ हजार ७६५ जना संक्रमित भएका छन् । 

 

त्यसैगरी केन्द्रीय राजधानीसमेत रहेको दिल्ली प्रदेशमा ७४ हजार ६२२ जना संक्रमित भएको स्वास्थ्य मन्त्रालयका अधिकारीहरुले जानकारी दिएका छन् ।  एएनआई