अमेरिका । संयुक्त राज्य अमेरिकामा कोरोना भाइरस (कोभिड-१९) का कारण मृत्यु हुनेको संख्या ५० हजार नाघेको छ ।

 

अन्तर्राष्ट्रिय सञ्चारमाध्यमहरूका अनुसार अप्रिल महिनामा मात्र अमेरिकामा औसतमा दैनिक दुई हजार मानिसको मृत्यु हुँदै आएको देखिएको छ ।

 

कोरोना भाइरसको विवरण सार्वजनिक गर्दै आएको वल्र्डोमिटरका अनुसार बिहीबार दिउँसोसम्म अमेरिकामा मृत्यु हुनेको संख्या ५० हजार २४३ पुगेको छ । अमेरिकामा कोरोना भाइरसबाट संक्रमितको संख्या ८ लाख ८६ हजार ७०९ पुगेको छ । 

 

अमेरिकामा पछिल्लो चौबिसघन्टामा २३४९ जनाले ज्यान गुमाएका छन् । कुल संक्रमितमध्ये ७ लाख ५० हजार २८४ जनाको उपचार जारी छ भने ८५ हजार ९२२ जना निको भएका छन् । 

 

अमेरिकामा सबैभन्दा प्रभावित न्यूयोर्कमा कुल २ लाख ६८ हजार ५८१ संक्रमित भएकोमा २० हजार ८६१ ले ज्यान गुमाएका छन् भने न्यूजर्सीमा १ लाख २५ संक्रमित भएकोमा ५ हजार ४२८ ले ज्या गुमाएका छन् । 

 

यसैबीच, अमेरिकामा बेरोजगारको संख्या ह्वात्तै बढेको छ । बेरोजगार सुविधाको लागि आवेदन दिनेको संख्या दुई करोड ६५ लाख नाघिसकेको छ । 

 

कोरोना भाइरस नियन्त्रणको लागि अमेरिकाभर लगाइएको लकडाउनको प्रत्यक्ष असर बेरोजगारीको संख्यामा देखिएको हो। अमेरिकामा बढ्दो बेरोजगारीको कारण अर्थतन्त्रमा पनि ठूलो असर पर्न सक्ने अर्थशास्त्रीहरूले चेतावनी दिँदै आएका छन् ।