वासिङ्टन । कोरोना भाइरसको संक्रमणको खतराबाट बच्नका लागि आगामी सन् २०२२ सम्म नै सामाजिक दुरी कायम गर्नुपर्ने निष्कर्ष एक अध्ययनले निकालेको छ । 

 

अमेरिकाको क्याम्ब्रिजमा रहेको हावर्ड विश्वविद्यालयका अनुसन्धानकर्ताहरुले गरेको एक अध्ययनले कोरोना भाइरसको संक्रमणको खतरा कम्तीमा पनि २०२२ सम्म रहिरहने देखाएको हो । 

 

विश्वविद्यालयका स्टेफन किसलरले नेतृत्व गरेको टोलीले कोरोना भाइरसको चरित्र, सर्ने प्रवृत्ति, क्षमतालगायतलाई आधार मानेर यो निष्कर्ष निकालेको जनाएको छ ।

 

विश्वभर सबैजसो देशमा पुगिसकेको कोरोना भाइरसलाई विश्वभरिबाटै निर्मुल पार्नु ठूलो चुनौतीपूर्ण कार्य भएको र अहिलेको चरणमा नियन्त्रण जस्तो देखिए पनि अर्को चरणमा पुनः फैलिनसक्ने पनि उनीहरुले अनुमान गरेका छन् ।      

 

अनुसन्धानकर्ताहरुले कोरोना भाइरसविरुद्धको कुनै खोप नआएमा वा यसलाई नियन्त्रण गर्ने कुनै उपाय सृजना नभएसम्म सामाजिक दुरी कायम गर्नै पर्नेमा जोड दिएका छन् ।

 

सामाजिक दुरी कायम गर्नु वा उच्च निगरानीमा रहेर उपचार गराउनु नै यसबाट बच्ने मुख्य उपाय हो, अनुसन्धानकर्ताहरुले अध्ययन प्रतिवेदनमा लेखेका छन् ।  

 

उनीहरुले उच्च सतर्कतासहितको उपचार सेवालाई सबै देशले थप विस्तार गर्नुपर्नेमा पनि जोड दिएका छन् । अध्ययनकर्ताहरुले सन् २०२४ सम्ममा मात्र कोरोना भाइरसविरुद्ध सजिलै लड्न सक्नेगरी व्यवस्थापन हुने अनुमान पनि गरेका छन् । 

 

विश्व स्वास्थ्य संगठनले पनि औषधि वा खोप तयार नहुँदासम्म यो रोगको जोखिम रहिरहने जनाएको छ । संगठनले विश्वभर दर्जनौ वैज्ञानिकहरुले खोप तयार पार्न परीक्षण र प्रयासहरु जारी राखेको पनि जनाएका छन् ।

 

कोरोना भाइरसका कारण बुधबारसम्म संसारभर २० लाख २८ हजार १०७ जना संक्रमित भएका छन् भने एक लाख २९ हजार १८७ जनाको मृत्यु भएको छ । 

 

यसको संक्रमण अहिलेसम्म २१० देशमा फैलिएको छ । मृत्यु हुने र संक्रमित हुनेहरु सवैभन्दा धेरै अमेरिकामा रहेका छन् । अमेरिकामा छ लाख १६ हजार ४५८ जना बिरामी हुँदा २६ हजार २१३ जनाको मृत्यु भएको छ । एएनआई