नयाँ दिल्ली । कोरोना भाइरसको विश्वव्यापी कहर रोकथामका लागि भारत सरकारले लकडाउन गरेपछि यतिबेला भारतका हजारौँ मजदुर गरिखाने वर्गको बिचल्ली भएको छ । उनीहरु भोकाएका थिए । तीमध्ये कतिपयले त कैयौं दिनदेखि खान पनि पाएका थिएनन् ।

 

धेरैजसो पानी र विस्कुटको भरमा धेरै दिनदेखि बसेका थिए । तर, उनीहरु सयौँ माइल हिँड्दै थिए । उनीहरु विभिन्न समूहमा छन् र केही आ–आफ्नो परिवार र आफ्ना बालबालिकासँग पनि थिए ।

 

कतिपय बृद्धबृद्धा छन् त कति स–साना केटाकेटी । केहीमात्र त्यो समूहमा युवायुवती छन् । महिला र पुरुष बराबरी छन् । उनीहरु त्यो मरुभूमिको बाटोमा हिँडिरहेका छन् ।

 

कतिका खुट्टामा चप्पल छैनन् त कतिले थाप्लोमा ठूल्ठूला भारी पनि बोकेका छन् । अनि युवायुवतीहरुले आफ्ना साना सन्तानलाई काखमा लिइरहेका देखिन्छन् ।

 

भारतका ठूला सहरहरुमा कामगर्ने मजदुर आप्रवासीहरु ती सहरहरु कोरोना भाइरसको त्रासका कारण बन्द भएपछि यति लामो बाटो हिँडेर आफ्नो घर फर्किँदैछन् ।

 

सहरमा मजदुरी काम गर्दै आएका उनीहरु सहरमा सरकारले ‘लकडाउन’ गरेपछि उद्योग कारखाना पनि बन्द भए । त्यसपछि कामविहीन बनेका उनीहरु सयौँ माइल हिँडेर गाउँघरमा फर्किंदैछन्।

 

उनीहरु आफैँ पनि कोरोना भाइरससँग तर्सिएर आफ्नो घर फर्किन लागेका हुन् । उनीहरुले सहरमा बस्दा प्रयोग गरेका आफ्ना सरसामानहरुसहित यति लामो बाटो हिँडेर गाउँ जान लागेका हुन् ।

 

भारत सरकारले २१ दिने भारत बन्दको घोषणा गरेको छ । यसबाट भारतका करिब एक अर्ब ३० करोड नागरिक घरभित्रै बस्नु परिरहेको छ । सामान्य रुपमा बिहान बेलुकी खाद्यान्न र तरकारीका लागि खोल्ने बाहेक भारतमा पसलहरु पनि खुलेका छैनन् ।

 

विश्वको दोस्रो ठूलो धेरै जनसंख्या भएको देश भारतमा यसरी गरिएको यो लकडाउनले नागरिकमा खाद्यान्न लगायतको संकट पनि निम्त्याउन सक्ने अनुमान धेरैले गरेका बताइएको छ ।

 

यसले दिनहुँ नै ज्याला मजदुरी गरेर छाक टार्नुपर्ने बाध्यतामा रहेका करोडौँ भारतीय नागरिकलाई ठूलो मार परेको छ । बजार तथा उद्योगहरु नै बन्द भएका कारण यहाँका करोडौँ नागरिकले बिहान बेलुकी खानाको समस्यामा पनि पर्नसक्ने बताइएको छ ।

 

यसरी सहरबाट ती नागरिक लुकिछिपी भित्री बाटोहरु भएर आफ्नो घरमा पुग्ने गरेका छन् । यदि भारतमा हाल जारी राखिएको वर्तमान लकडाउनलाई अझै केही दिन लम्व्याउने हो भने यहाँ यस्तो मजदुर वर्गमा ठूलो समस्या ल्याउने बताइन्छ । एपी