ड्यालस (टेक्सस) – एनआरएन अमेरिकाको आयोजनामा आज आइतबार साँझ ड्यालसको आर्लिङ्गटनमा हुन लागेको ‘नेपाली युवा सम्मेलन’ को तयारी पुरा भएको छ ।
युवा तथा विद्यार्थी समुदायलाई एनआरएन प्रति आकर्षित गर्ने उद्वेश्यले यो सम्मेलन हुन लागेको हो । सम्मेलन आयोजक समितिका संयोजक सन्देश उप्रेतीका अनुसार अमेरिकास्थित नेपाली राजदूत डा. अर्जुनकुमार कार्कीले सम्मेलनको उद्घाटन गर्ने कार्यक्रम रहेको छ ।
सम्मेलनका अमेरिकाभरि रहेका नेपाली युवा तथा विद्यार्थीहरुको सहभागिता हुने समेत उप्रेतीले जानकारी दिए । पछिल्लो समयमा एनआरएन अमेरिकाले यहाँ रहेका युवा तथा विद्यार्थीको समस्याप्रति ध्यान नदिएको भन्दै सदस्य बन्ने र सकृय हुने क्रम बन्द जस्तै भएको छ । त्यसैलाई मत्थर पारेर युवा तथा विद्यार्थीलाई संस्थाप्रति आकर्षित गर्ने र उनीहरुका समस्यालाई समाधान गर्न पहल गर्ने उद्वेश्य साथ यो कार्यक्रम हुन लागेको जनाइएको छ ।
आर्लिङ्टनस्थित युनिभर्सिटी अफ टेक्ससको हलमा हुने कार्यक्रममा सहभागी हुनका लागि संयोजक उप्रेतीले सबैसँग अपिल गरेका छन् । राजदूत कार्कीसँग विद्यार्थीले आफ्ना समस्या राख्ने अवसर समेत मिल्ने भएकोले सहभागी भएर आफ्ना जिज्ञासाहरु राख्न समेत उनले आग्रह गरेका छन् ।
प्रतिक्रिया