काठमाडौँ । नेपाली लेग स्पिनर सन्दीप लामिछानेले अस्ट्रेलियामा जारी बिग ब्यास लिग क्रिकेटमा उत्कृष्ट बलिङ गरेका छन् ।

 

बिग ब्यास लिगमा मेलबर्न स्टार्सबाट खेल्दै आएका उनले आज मेलबर्न रेनेगेड्सविरुद्धको खेलमा उत्कृष्ट बलिङ गर्दै तीन विकेट लिएका हुन् । उक्त खेलमा मेलबर्न स्टार्स आठ विकेटले विजयी भएको छ । 

 

अघिल्लो खेल चोटका कारण गुमाउनुभएका सन्दीपले आज चार ओभर बलिङ गर्दै २६ रन खर्चिए । उनले पहिलो ओभरमा बिना कुनै विकेट सात रन दिए । 

 

आफ्नो दोस्रो ओभरमा पनि सन्दीपले कुनै विकेट झार्न सकेनन् । उनले सो ओभरमा १२ रन खर्चिए । तेस्रो ओभर भने उनका लागि उपलब्धिपूर्ण रह्यो ।

 

उक्त ओभरमा उहाँले दुई विकेट लिँदै चार रन मात्र खर्चिए । उनले सावन मार्स र डेनियल क्रिष्टिनलाई पेभेलियन फर्काएका थिए । 

 

आफ्नो अन्तिम ओभरमा सन्दीपले टोम कुपरको विकेट लिँदै तीन रन मात्र खर्चिए । यस यामको बिग ब्यासमा सन्दीप हालसम्म पाँच खेल खेल्दैछ । 

 

सन्दीपको टोली मेलबर्न स्टार्सले आज टस जितेर फिल्डिङ राजेपछि मेलबर्न रेनेगेड्सले निर्धारित २० ओभरमा नौ विकेट गुमाएर १४२ रन बनाएको थियो । 

 

एक सय ४३ रनको विजयी लक्ष्य मेलबर्न स्टार्सले १८ दशमलव पाँच ओभरमा दुई विकेट गुमाएर पूरा गर्‍यो । बिग ब्यासमा सन्दीपको टोली मेलबर्न स्टार्स अङ्क तालिकाको शीर्ष स्थानमा छ ।

 

मेलबर्नले हालसम्म छ खेलमध्ये पाँचमा जित निकाल्दै १० अङ्क बटुलेको छ ।