हेटौँडा । उच्च सरकारी वकिलको कार्यालय हेटौँडाले पत्रकार शालिकराम पुडासैनी आत्महत्या प्रकरणका आरोपित टेलिभिजन कार्यक्रम प्रस्तोता रवि लामिछाने, युवराज कँडेल तथा आरोपित अस्मिता कार्कीलाई हिरासतमा नै राखेर अनुसन्धान गर्नुपर्ने निवेदन दर्ता गरेको छ । 

 

सोमबार उच्च अदालत पाटन, हेटौँडा इजलासमा उच्च सरकारी वकिल कार्यालय हेटौँडाले  निवेदन दिएको उच्च अदालत हेटौँडा इजलाशका रजिष्ट्रार विकास श्रेष्ठले जानकारी दिए ।   निवेदन उपर मंगलबार सुनुवाइ हुनेछ ।

 

यसअघि धरौटीमा रिहाइ भएका लामिछाने र कँडेलले आफूले आत्महत्या दुरुत्साहन नगरेकाले साधारण तारिखमा रिहा हुनुपर्ने र विदेश जान प्रतिबन्ध लगाउन नहुने भन्दै जिल्ला अदालत चितवनको आदेशविरुद्ध निवदेन दर्ता गराएका थिए ।  

 

पुडासैनीलाई आत्महत्या गर्न दुरुत्साहन गरेको अभियोगमा लामिछाने र युवराज कँडेल जिल्ला अदालत चितवनले भदौ ९ गते क्रमशः पाँच र तीन लाख रुपैयाँ धरौटीमा रिहा गर्ने आदेश दिएको थियो ।