हिमालयखवर संवाददाता

अमेरिका- स्टार्ट अप कम्पनी दाबी गर्ने सगुनले कम्पनीमा लगानी गर्न उपलव्ध गराइने कुनै पनि जानकारीहरुमा कसैलाई पनि लोभ लालच देखाउने वा अनावश्यक भ्रम छरि लगानी जुटाउने काम नगरेको दावी गरेको छ ।

 

बेलायतमा एनआरएनए एनसीसी वेलायतको निर्वाचनको सन्दर्भमा उम्मेदवारसंग जोडेर समाचार आएपछि सगुनले विज्ञप्ति मार्फत उक्त दावी गरेको हो । विज्ञप्तिमा नेपालीहरुले शुरु गरेको अभियानमा विश्वभर छरिएर रहेका हज्जारौं नेपाली तथा नेपालीका संघ संस्थाले सहयोग गरेको उल्लेख छ ।

 

अमेरिकामा दर्ता भएको सगुनले अमेरिकी कानुन अनुसार मिनी आईपिओ जारी गरेको थियो । त्यसवेला स्टार्ट अप कम्पनी भएकाले भविष्य फेसबुक र गुगलको जस्तै हुन सक्ने दावी सगुनले गरेको थियो । तर, सगुनले मिनी आईपिओ जारी गर्दा सार्वजनिक गरेको विवरणमा थुप्रै जोखिमहरु पनि उल्लेख गरिएका थिए । अमेरिकी कानुन अनुसार जोखिमहरु पनि सार्वजनिक गर्नु पर्ने हुन्छ ।

 

सगुनका लगानीकर्ताले अहिलेसम्म कुनै फाइदा पाएका भने छैनन् । सगुनको शेयर मिनी आईपिओ भएकाले स्टक एक्स्चेञ्जमा दर्ता नहुने हुदां त्यस मार्फत खरिद विक्री गर्न सकिदैंन ।