हिमालयखबर संबाददाता-
ड्यालस (टेक्सस) । अध्यागमन कानुनको क्षेत्रमा अमेरिकामा लामो समयदेखि कार्यरत अधिवक्ता बासु फुलाराले आइसिई (इमिग्रेसन एण्ड कस्टम इन्फोर्समेन्ट) का अधिकारीहरुले रोजगारदाताको स्विकृती बेगर छापा मार्न र कामदारलाई पक्राउ गर्न नमिल्ने जानकारी दिनुभएको छ ।
आइतबार ड्यालसमा आयोजित कार्यक्रममा फुलाराले रोजगारदातासँग स्विकृती लिएर मात्र कार्यक्षेत्रमा आइसका अधिकारीहरुले छापा मार्ने, कामदारहरुसँग कागजपत्र माग्न सक्छन् । रोजगारदाताको अनुमति नभएसम्म आइसका अधिकारीहरु कामदार भएको स्थानमा प्रवेश गर्न नपाउने समेत फुलाराले स्पष्ट पार्नुभएको छ ।
नेपाली समाज टेक्सस, एनआरएन टेक्सस च्याप्टरको आयोजनामा भएको कार्यक्रममा फुलाराले अध्यागमन कानुनका सम्बन्धमा भैरहेको परिवर्तन र त्यसले नेपालीलाई पार्ने प्रभावका बारेमा पनि बताउनुभएको थियो ।
भिजिटर भिसामा आएका र एफवान भिसामा भएकाहरुले अमेरिकामा काम गर्नु कानुनको उल्लंघन भएको उल्लेख गर्दै कसैले पनि कानुन उल्लंघन गर्न नहुने उल्लेख गर्नुभयो ।
अमेरिकामा हरेक व्यक्तिले गरेका कानुनका उल्लंघन रेकर्डेड हुने भएकोले ढाँट्न, छल्न नहुने उल्लेख गर्दै फुलाराले सवारी साधन चलाउँदा बारम्बार पाएको टिकटले पनि आप्रवासीलाई असर पार्ने बताउनुभयो ।
नेपाली समुदायबाट राखिएका अध्यागमन कानुन, अन्य कानुनी जिज्ञासाको फुलाराले त्यस अवसरमा जवाफ दिनुभएको थियो ।
पत्रकार सूर्य थापाले सञ्चालन गर्नुभएको कार्यक्रममा अमेरिकाका बिभिन्न राज्यहरुमा रहेका नेपालीहरुले समेत जिज्ञासा राखेका थिए ।
प्रतिक्रिया