चितवन । विगत ६ दिनदेखि भरतपुरबाट बेपत्ता भएका चितवनको कालिका नगरपालिका वडा नं ६ बाग्लुङ्गेटोलका २४ वर्षीय सुदीप सापकोटा तेह्रथुमको एक होटलमा भेटिएका छन् ।
गत कात्तिक २६ गते सोमबार विदेश यात्राको लागि आवश्यक सामान खरिद गरी फर्कने क्रममा उनी भरतपुरबाट बेपत्ता भएका थिए । अष्ट्रेलिया जाने तयारीमा रहेका भनिएका सुदीप नारायणगढमा सपिङ गरेपछि सुटकेससहित बेपत्ता भएका थिए ।
प्रहरीको विशेष अनुसन्धान टोलीले सापकोटालाई तेह्रथुमको एक होटलमा फेला पारेको चितवनका प्रहरी प्रमुख सुशीलसिंह राठौरले जानकारी दिए ।
सुदीपसँग भएको अष्ट्रेलियन भिसा नै नक्कली भएको प्रहरीले जनाएको छ । अष्ट्रेलिया जाने तयारीमा रहेको भनिएका सापकोटा एकाएक हराएको खबरले चितवनमा सनसनी फैलिएको थियो ।
उनको एक महिनाअगाडि मात्रै विवाह भएको थियो । उनले अष्ट्रेलिया जाने तयारी गरिरहेको परिवार तथा आफन्तलाई बताउँदै आएका थिए ।
सुदीपले भारतमा बसेर कम्प्युटर इन्जिनियरको पढाइ सकेको परिवार स्रोतले बताएको थियो ।
इलाका प्रहरी कार्यालय टाँडीका डीएसपी दयानिधि ज्ञवालीले अष्ट्रेलिया जान भनेर सापकोटाले बनाएको सबै डकुमेन्ट फेक भएको जानकारी दिएका छन् ।
सापकोटाको ल्यापटपमा भएको डकुमेन्ट र अन्य अनुसन्धान गर्दा भिसा फेक देखिएको उनले बताए । यसैकारण सापकोटा भागेको हुनसक्ने डीएसपी ज्ञवालीको अनुमान छ ।
सापकोटाको मोबाइल ट्यापिङका आधारमा भेट्टाउन सफल भएको प्रहरीको भनाइ छ । सापकोटाले मोबाइल अफ गरे पनि वाइफाइ भने निरन्तर चलाएको प्रहरी अनुसन्धानबाट खुलेको छ ।
सापकोटा तेह्रथुम प्रहरीको नियन्त्रणमा रहेको र उनलाई लिन परिवारका सदस्य त्यसतर्फ लागेको बाबु गंगा सापकोटाले जानकारी दिए ।
प्रतिक्रिया