नेप्लिज एशोसियसन अफ ह्युस्टनको नयाँ कार्यसमिति 

 

ह्युस्टन , टेक्सास । दशैं उत्सव मनाउन आयोजना गरिएको कार्यक्रमको मनोरन्जन सकिएको थिएन , ताज हलमा उपस्थित सहभागीहरुले आफ्नो संस्थाको नयाँ कार्यसमितिको घोषणा सुने । निर्वाचित कार्यसमितिलाई हार्दिकतापुर्वक स्वागत गरे सहभागीहरुले , बधाई र शुभकामना दिए । 

 

सधैं झैं यो पटक पनि नेप्लिज एशोसियसन अफ ह्युस्टनको नयाँ कार्यसमिति सर्वसम्मत निर्वाचित भयो । अरु अमेरिकी शहरहरुमा भएका नेपाली संस्थाहरु राजनीतिक ,जातीय र साम्प्रदायिक कलेवरले मुछिएका र पदकोलागि हानाथाप भएका चर्चा व्यापक भैरहंदा ह्युस्टनमा भने आपसी समझदारी र सौहार्दपुर्णरुपमा एशोसियसनको निर्वाचन हुनु यहाँको नेपाली समुदायको सामुहिकता र मेलमिलापको उदाहरण मानिएकोछ । 

 

निर्वाचन समितिका संयोजक तारा बरालले निर्विरोध निर्वाचित पदाधिकारी सदस्यहरुको नाम घोषणा गर्दा हलमा रमाइलो उत्सुकता देखिन्थ्यो । 

 

विष्णु नेपाल ,पीएचडीको अध्यक्षतामा निर्वाचित नयाँ कार्यसमितिमा ज्योति घिमिरे -आइपीपी , रविन्द्र श्रेष्ठ प्रथम उपाध्यक्ष , द्रोण गौतम द्वितीय उपाध्यक्ष , विजय वोखिम सचिव र चेज गुरुङ्ग कोषाध्यक्ष छन् । सहायक सचिवमा प्रशान्ती पण्डीत र सदस्यहरुमा दीपक रायमाझी , मनिष मुनाकामी , राम कुँवर र शिव सेढाई निर्वाचित भएकाछन् । 

 

सहायक कोषाध्यक्ष र चारजना सदस्यको पद भने उम्मेद्वारी नपरेकोले रिक्त रहेको जानकारी संयोजक बरालले दिएका थिए । 

 

नयाँ कार्यसमितिमा धेरै युवा अनुहार छन् । निर्वाचन समितिमा  संयोजक बरालसंग विनोद श्रेष्ठ र दिनकर अमात्य सदस्य थिए । 

 

नवनिर्वाचित अध्यक्ष विष्णु नेपालले पशुपति मन्दिर र सामुदायिक केन्द्रको कार्यलाई अघाडि बढाउने आफ्नो कार्यकालको प्रमुख एजेन्डा रहेको जानकारी दिंदै आगामी दिनमा समन्वय र सामुहिकतामा जोड दिने बताए । 

 

आफ्नो विदाई मन्तव्यमा ज्योति घिमिरेले आफ्नो कार्यकालको उपलब्धी र कमजोरी उल्लेख गर्दै नयाँ कार्यसमितिले आफूले थालेका बाँकी कामहरु पुरा गर्ने विश्वास व्यक्त गरे । 

 

यसअघि पत्रकार तारा बरालले नेप्लिज एशोसियसन अफ ह्युस्टनको विगत र वर्तमान कार्यकालको समीक्षा गर्दै एशोसियसनले नेपाली समुदायको प्रभावकारिता र गौरव बढाएकोमा बधाई दिए । 

 

संस्थाको जग त्यसका साधारण सदस्य भएको तर एनएएच कार्यसमितिले सदस्यता विस्तारमा भने उल्लेख्य काम नगरेकोमा बरालको तीखो टिप्पणी थियो । 

 

रमाइलो साँझ 

दशैं उत्सव मनाउन भेला भएका सहभागीहरुले स्थानीय कलाकारद्वारा प्रस्तुत विविध सांस्कृतिक कार्यक्रमको आनन्द पनि लिए । जनक थापाको संयोजनमा आयोजित उक्त सांगीतिक साँझमा साई लामा , जनक थापा र अर्जुन पोख्रेलले मनोरन्जक गीत गाएका थिए । 

 

त्यसैगरी बाल कलाकारहरुले रोचक नॢत्य र गीत प्रस्तुत गरे । कॢति सापकोटा , श्रुति ज्ञवाली ,काव्या नेपाल , आर्या जोशी , अविज्ञा न्यौपाने , ज्योति कुँवर लगायतको सांस्कृतिक प्रस्तुतिले दर्शकलाई खुसी बनाएको थियो । 

कार्यक्रमको उद्घोषण राम कुँवरले गरेका थिए । 

 

गीत संगीतमा राती अबेरसम्म नाचेका दर्शकहरु भन्दै थिए – परदेशमा यसरी नै भएपनि दशैंको स्वागत गरौं ।