हिमालयखवर संवाददाता

ड्यालस (टेक्सस) – नेपाली समाज टेक्ससले एकलाख डलरको आकस्मिक राहत कोष स्थापनाका लागि संकलन कार्य सुरु भएको जनाएको छ ।

 

समाजले बिहीबार साँझ आयोजना गरेको पत्रकार सम्मेलनमा अध्यक्ष सुमन थापाले डिएफडब्लु एरियामा नेपाली समुदाय बढेसँगै घटनाहरु बढीरहेको र त्यसका लागि आकस्मिक राहत कोष स्थापना गर्नका लागि प्रकृया अघि बढिसकेको जानकारी दिए । समाजको नयाँ टीमले चुनावी कार्यक्रमको सिलसिलामा एकलाख डलरको आकस्मिक राहत कोष स्थापना गर्ने र त्यसबाट समुदायका कसैलाई पनि केही पर्दा सहयोग गर्ने प्रतिवद्धता जनाएको थियो ।

 

‘आउने दिनहरुमा आर्थिक सक्षमताका लागि पनि हामीले धेरै कामहरु गर्नुपर्ने अवस्था छ,’ अध्यक्ष थापाले भने । गोफण्डबाट मात्र सहयोग जुटाउने कार्यलाई अघि नबढाई अरुनै उपायबाट दिगो रुपमा कार्यक्रम गर्ने योजना समाजले बनाएको समेत थापाले उल्लेख गरे । 

 

अमेरिकामा रहेका नेपाली संघसंस्थाहरुमध्य नेपाली समाज अग्रपङ्क्तीमा आइरहेको उल्लेख गर्दै थापाले संस्थालाई नयाँ रुपमा लैजानका लागि बिभिन्न खेलकुद, सामाजीक कार्यहरुमा समेत अघि बढाउने तयारी भैरहेको जानकारी दिए । 

 

कार्यक्रममा समाजका महासचिव भक्त भण्डारीले समुदायको सेवाका लागि संस्थाले कुनै पनि कामहरु गर्न पछि नपर्ने प्रतिवद्धता जनाएका थिए ।