काठमाडौँ । भक्तपुरको सूर्यविनायकमा बुधबार टिपरको ठक्करबाट मोटरसाइकल चालक नमोबुद्धका २५ वर्षीय रामकृष्ण श्रेष्ठको मृत्यु भएपछि स्थिति तनावग्रस्त बन्न पुग्यो ।
बा ४ ख ३६५० नम्बरको टिपरले बा ८८ प ८५२ नम्बरको मोटरसाइकललाई ठक्कर दिएको थियो । एउटै दिशाबाट आएको टिपरले मोटरसाइकललाई पछाडिबाट ठक्कर दिएको थियो । मोटरसाइकल चालक श्रेष्ठको मृत्यु भएपछि स्थानीय आक्रोशित बनेका थिए ।
आक्रोशित स्थानीयले टिपरमा आगजनी गरे । आगजनी गरेका स्थानीयमाथि प्रहरीले लाठी प्रहार गरेको थियो भने केही समयपछि अश्रुग्यास प्रहार गरेको थियो ।
तीव्र गतिमा रहेका टिपरले साना सवारी र पैदल यात्रुलाई ठक्कर दिने क्रम बढेपछि स्थानीय प्रशासनले साउन १ गतेदेखि उपत्यकाभित्र बेलुका ८ बजेदेखि बिहान ५ बजेसम्म मात्रै चलाउनुपर्ने समय तोकेको थियो । तर, काठमाडौं जिल्ला प्रशासन कार्यालयले बुधबारदेखि बेलुका ७ बजेदेखि बिहान ७ बजेसम्म चल्न पाउने निर्णय गरेको थियो ।
प्रहरी परिसर भक्तपुरका अनुसार साँगाबाट ६ बजे छुटेर तीव्र गतिमा आएको टिपरले मोटरसाइकललाई ठक्कर दिएपछि टिपरका चालक फरार भएका थिए । ठक्करबाट मोटरसाइकल चालकको मृत्यु भएपछि आक्रोशित भीडले टिपरमा आगो लगाइदिएर ध्वस्त बनाइदिएका छन् ।
आगो नियन्त्रणका लागि आएका प्रहरीले भीड हटाउन खोज्दा आक्रोशित भीडले नाराबाजी गरेपछि प्रहरीले लाठीचार्ज गरेको स्थानीय हरिशरण थापाले बताए ।
आगो नियन्त्रण गर्न आएको दमकललाई समेत भीडले ढुङ्गा हानेर तोडफोड गरेपछि प्रहरीले भीडलाई नियन्त्रणमा लिन अश्रुग्यास प्रहार गरेको जनाएको छ । स्थानीयका अनुसार प्रहरीले १५ सेलभन्दा बढी अश्रुग्यास प्रहार गरेको हो ।
यसैबीच, घटनालाई शान्तिपूर्णरुपमा नियन्त्रणमा लिन सकिने भए पनि प्रहरीले अन्धाधुन्ध लाठीचार्ज गरेको थियो । प्रहरीले राति घर जान लागेका, पसल सञ्चालन गरेका व्यापारीदेखि सुत्केरी महिलासमेतलाई अन्धाधुन्ध लाठीचार्ज गरी घाइते बनाएको थियो ।
प्रतिक्रिया