हिमालयखबर संवाददाता
नारायणगढ– गत साउन १८ गते प्रधानमन्त्री शेरबहादुर देउवा विस्तारको काम भइरहेको नारायणगढ–मुग्लिन सडक निर्माणको निरीक्षणको लागि आए । सो बेला आयोजना प्रमुख र ठेकेदारहरुलाई प्रधानमन्त्री देउवाले युद्धस्तरमा काम गरेर आयोजनाको काम चाँडो सक्न निर्देशन दिए ।
प्रधानमन्त्री देउवा यातायातमन्त्री, सांसद र सचिवहरुको जम्बो टोली लिएर निरीक्षणमा आएका थिए । हेलिकप्टर ल्याएर आएको टोलीले सडक मार्ग हुँदै केही परसम्म पुगेर निर्माण कार्यको अनुगमनसमेत गरेको थियो । देशको र खास गरेर काठमाडौंको लाइफ लाइनका रुपमा रहेको हुँदा सो सडकको काम तत्काल सक्न प्रधानमन्त्रीले पटकपटक निर्देशन दिए ।
राज्यले यत्रो चासो दिएपछि सडक निर्माणको कामले अवश्य रफ्तार लेला भन्ने धेरैलाई लागेको थियो । तर, आयोजनाको सुस्त पारामा कुनै सुधार आएको छैन । प्रधानमन्त्रीको निर्देशनपछि अहिलेसम्म सो सडक निर्माणमा जम्मा चार प्रतिशतमात्रै थप प्रगति भएको छ ।
प्रधानमन्त्रीसहितको टोलीलाई निर्माणको अवस्थाका बारेमा जानकारी गराउँदा आयोजना प्रमुख चन्द्रनारायण आयदवले साउन १५ सम्म लगभग साढे ५३ प्रतिशत काम पूरा भएको बताएका थिए । जब कि लक्ष्य अनुसार त्यो बेलासम्म ८२ प्रतिशत काम सकिनुपर्ने थियो । आयोजनाका सूचना अधिकारी इन्जिनियर शिव खनालका अनुसार हाल सो सडकको ५७ प्रतिशत काम पूरा भएको छ ।
प्रधानमन्त्री देउवाअघि संसदको विकास समितिका सभापति रविन्द्र अधिकारीसहितका सांसदहरुको टोली आएर सडक निर्माणका विषयमा अनुगमन गरेका थिए । समितिले पनि सडकको काम तत्काल सक्नका लागि विशेष निर्देशनहरु दिएको थियो । प्रधानमन्त्रीपछि पनि यातायात राज्यमन्त्रीको नेतृत्वमा आएको टोलीले अनुगमन नगरेको होइन । तर, आयोजनाको काम गर्ने तरिकामा सुधार देखिएको छैन ।
सो सडक गत वर्ष अर्थात सन् २०१७ कै अप्रिल महिनाभरी निर्माण भएर सकिनु पर्ने सुरूवातको सम्झौता थियो । तर काममा निकै ढिलाइ भएको छ । सडक निर्माण हुने अवधि थप गर्दै आउँदो वर्ष अर्थात् सन् २०१८ को फेब्रुअरी २० अर्थात फागुनसम्म निर्माण सकिने भनिएको छ । तर, काम जम्मा ५७ प्रतिशतमात्रै पूरा भएको कारण त्यो समयमा पनि सकिनेमा ठूलो आशंका छ ।
तर, अधिकारीहरु अफ्ठ्यारो काम सकिएका कारण अब भने काममा प्रगति हुने दाबी गर्छन् । ‘अब कटिङ र पर्खाल लगाउने काम लगभग सकिएका कारण धामधम कालोपत्रे हुन्छ । त्यसैले चाडो नै काम सकिनेमा विश्वस्त बनौं’ इन्जिनियर खनालले भने । कालोपत्रे सुरू भए पनि काम अझै द्रुत गतिमा हुन सकेको छैन ।
विसं २०३६ सालमा नारायणगढलाई गोरखासँग जोड्नका लागि चीन सरकारको सहयोगमा सो सडक निर्माण भएको हो । जुन सडक अहिले साढे पाँच मिटर मात्रै छ । यो सडकले मुग्लिनमा पृथ्वीराजमार्गलाई छोएको छ । त्यसैले यो सडक राजधानी काठमाडौं र पर्यटकीय सहर पोखरालाई देशको पूर्वी र पश्चिम भागसँग जोड्ने मुख्य मार्ग हो ।
दिनहुँ १० हजारका हाराहारीमा गाडी ओहरदोहर गर्ने यो मार्गलाई एसियाली मापदण्ड अनुरुपको दुई लेनको बनाउन सन् २०१५ को अप्रिलमा निर्माण सम्झौता भएको हो । विस्तारको काम सकिएपछि यो सडक नौ देखि ११ मिटर चौडा हुने छ । विश्व बैंकको ऋण सहयोगमा निर्माणको कार्य भइरहेको छ । निर्माण कार्य नसकिदा पहिरोको जोखिम पनि बढेको छ । यात्रुको मृत्युसमेत हुने गरेको छ ।
प्रतिक्रिया