हिमालय खबर संबाददाता-
बीबीसी नेपाली सेवासंग आवद्ध संचारकर्मी रविन्द्र मिश्रले पत्रकारिता छाडेर राजनीतिमा आउन लागेको समाचारले नेपाली सञ्चार माध्यम र सामाजिक सञ्जालमा सोमबार चर्चा पाएको छ । पुराना राजनीतिक पार्टी प्रति वितृष्णा बढीरहेको वेला उनीहरूलाई नै एकवद्ध गरेर जाने उद्देश्य राखी राजनीतिमा आउन लागेका हुन् ।
लामो समय बिबिसी नेपाली सेवामा रहेका काम गरेका मिश्रले केही समय अघि दिएको राजीनामा मङ्गलवार स्वीकृत भएको हो । उनले काठमाडौमा मङ्गलवार विज्ञप्ति जारी गर्दै समूहमार्फत यसका लागि पहिलेदेखि नै तयारी भइरहेको र उपयुक्त समय आएकाले राजनीतिमा होमिन लागेको धारणा व्यक्त गरेका छन् ।
पुराना सत्तारुढ राजनीतिक पार्टी प्रति असन्तोष बढ्दो छ । केही नयाँ अनुहार आए हुन्थ्यो भन्ने समूह तयार भइरहेका वेला मिश्रले लिएको यो निर्णयलाई समाजिक सञ्जालमा धेरैले प्रशंसा गरेका छन् । तर, शङ्का गर्नेहरु पनि केही छन् । प्रशंसा गर्नेमा विशेषगरी विद्यमान अस्थिर राजनीति प्रति चित्त नवुझेका युवा जमात अगाडी छ ।
केही वर्ष यता मिश्रले पनि विद्यमान राजनीतिक पार्टी र तिनका काम प्रति तीव्र आक्रोस व्यक्त गर्दै आएका थिए । मिश्रको पारिवारिक पृष्ठभूमि राजनीति भने होइन । बुवा मनोजबावु मिश्र चर्चित चित्रकार र साहित्यकार हुन् । राजनीतिमा जान्छु भनेर बुवा र आमालाई सोध्दा अलिकति चित्त नवुझाएको जस्तो गर्नु भएको थियो मिश्र भन्छन् ।
उनले विज्ञप्तिमा एउटा टोलमा कम्तीमा ७ जना आफ्नो समूहमा सहभागी हुन आउन अनुरोध गरेका छन् । बेलायतको विश्व प्रसिद्ध संचारसंस्था बीबीसीमा २२ वर्ष काम गरेका मिश्र १० वर्ष नेपाली सेवासंग आवद्ध थिए । यसक्रममा उनले कयौँ राजनीतिज्ञ लगायत नेपाली समाजका विभिन्न व्यक्तित्वसंग कुराकानी गरेका थिए ।
बीबीसी छाड्दै गर्दै आफ्नै सहकर्मीसंग कुराकानी गर्दै मिश्रले फोहोर बनाइएको पोखरीमा हाम हाल्न आएको बताएका छन् । यसरी हामफाल्न आउँदा मनमा अलिकति भय छ ।
भारतमा अरविन्द केजरीवालको उदय जस्तै मिश्रले नेपाली राजनीतिलाई प्रभाव पार्न सक्ने अनुमान पनि गरिएको छ । नयाँ दिल्लीका मुख्यमन्त्री केजरीवालले पुराना राजनीतिक पार्टीलाई राज्य भित्र प्रतिस्पर्धामा नयाँ दिल्लीको राजनीतिबाट लगभग समाप्त पारिदिएका थिए । यो उदाहरणवाट पनि नेपाली समाज विशेषगरी युवा जमात जानकार थियो ।
मिश्रले आफ्नै सहकर्मीसंग मङ्गलवार अन्तवार्तामा राजनीतिको चरित्र र विकासको गति परिवर्तन गर्न आफू यस क्षेत्रमा आएको दाबी गरेका छन् । परिवर्तनको भावना बोकेका लाखौ नेपालीले मलाई साथ दिन्छन् भन्ने लाग्छ उनले भनेका छन् यदि दिएनन भने परिवर्तन गर्नु पर्यो भन्नेहरु संवेदनशील रहेनछन भन्ने बुझ्नु पर्यो । राजनीतिलाई सुद्धिकरण गरेर वदल्न सकिन्छ उनको विश्वास छ ।
कल्याणकारी लोकतन्त्र र कल्याणकारी उदारवादी अर्थतन्त्र आफ्नो पार्टीको मुख्य नीति हुने उनले विज्ञप्तिमा जनाएका छन् । तर, पार्टी के नाममा कहिले सम्म आउँछ कुनै उल्लेख छैन ।
विज्ञप्तिमा मिश्रले विदेशमा बस्ने लाखौँ नेपाली समुदायमा सद्भाव समूह बनाएर जोडिने उल्लेख गरेका छन् । विदेशमा वसेरपनि लाखौँ युवाहरूले देशको राजनीति प्रति चासो राख्दै आएका छन् । समाजिक सञ्जालमा पनि युवाहरू विदेशबाट सक्रिय छन् । झन्डै ४० लाख नेपाली युवा विदेशमा वस्छन । अधिकांश विद्यमान राजनीतिक अवस्थाको परिवर्तनको पक्षमा छन् । दिल्लीमा केजरीवालले विदेशमा बस्ने भारतीयलाई पनि आफ्नो अभियानमा जोडेका थिए ।
मिश्रको प्रेस विज्ञप्ति पूर्ण विवरण
मिति: १७ फागुन २०७३ (28 February 2017)
केही समययता म लगायत कैयौं साथीहरूले नेपालमा संवैधानिक र समावेशी लोकतन्त्रभित्र पद्धति (सिस्टम), पारदर्शिता (ट्रान्सपरेन्सी), इमान्दारी (इन्टेग्रटी) र उत्कृष्टता (मेरिटोक्रसी) अर्थात् ‘स्टिम’को चार खम्बामा सुसंस्कृत राजनीतिको जग निर्माण नगर्ने हो भने यो देशको रूपान्तरण हाम्रो जीवनकालमा सम्भव छैन भन्ने तर्क गर्दै आएको कतिपय पाठक तथा शुभेच्छुकलाई विदित नै छ।
त्यस्तो सुसंस्कृत राजनीतिको सशक्त जग निर्माण गर्न सके दशकौंको स्वार्थलिप्त, दोहनकारी, आडम्बरी र अपारदर्शी राजनीतिका कारण देशको दुर्दशाबाट दिक्क भएका तर यो देश बनाउन सकिन्छ भन्ने विश्वास बोकेका स्वदेश तथा विदेशमा रहेका नेपालीले अवश्य साथ दिनेछन् भन्ने हाम्रो निष्कर्ष हो। हाम्रो उद्देश्य सबै क्षेत्रका इमान्दार र क्षमतावान नेपाली मिलेर स्वच्छ राजनीतिको बलमा देशलाई रूपान्तरण गर्ने साझा मञ्च निर्माण गर्नु हो। देशको ठूलो जनसमुदाय त्यसरी एक ढिक्का हुँदा “अस्तित्वमा आउने तर कहिल्यै देशको समृद्धिमुखी नेतृत्व गर्नै नसक्ने” अर्को एउटा राजनीतिक पार्टी होइन, देशलाई आमूल परिवर्तनकारी दिशामा डोर्याउन सक्ने नेतृत्व निर्माण हुनसक्छ भन्ने हाम्रो ठम्याई हो।
त्यसका लागि एउटा समूह लामो समयदेखि वैचारिक र रणनीतिक मन्थनमा सक्रिय थियो। सो समूहले अब आफ्नो गृहकार्यलाई कार्यरूपमा परिणत गर्ने आत्मविश्वास हासिल गरेको छ। तसर्थ मैले बीबीसी नेपाली सेवाको प्रमुखको पदबाट राजीनामा दिएको छु। बीबीसीसँगको लामो आबद्धता, मेरो लेखन तथा परोपकारी अभियानका क्रममा मैले देशभित्र र बाहिर आमनेपालीबाट पाएको विश्वास, स्नेह र सहयोगलाई म सधैं सम्झिरहने छु। त्यसका लागि मैले जति आभार प्रकट गरे पनि त्यो अपर्याप्त नै हुनेछ भने म मेरा सहकर्मी र बीबीसीप्रति पनि सदा आभारी रहिरहने छु।
मैले शुरू गर्न आँटेको राजनीतिक यात्रामा त्यो विश्वास, स्नेह र सहयोग अनि हाल गृहकार्यमा संलग्न साथीहरूले दिएको प्रेरणा र शक्तिले अत्यन्तै ठूलो ऊर्जा प्रदान गरेको छ। कतिपय शुभेच्छुकहरूले हाल विद्यमान कुनै पार्टीमार्फत नै राजनीतिकरूपमा अगाडि बढ्दा उपयुक्त हुने सल्लाह नदिएका होइनन्। तर विद्दयमान पार्टीहरूमार्फत अगाडि बढ्ने हो भने “आफू बदलिने तर समग्र देश नबन्ने” निष्कर्षमा पुगेका कारण मैले यो अलग र चुनौतिपूर्ण बाटो चयन गरेको हुँ।
हामी छिटै कल्याणकारी लोकतन्त्र र कल्याणकारी उदारवादी अर्थतन्त्रलाई आत्मसात गर्ने नयाँ पार्टीमा तल्लो निकायदेखि तपाईंको सहभागितासहितको संगठन निर्माण र सम्बन्धित अन्य विषयबारे थप जानकारी उपलब्ध गराउनेछौं। कुनै दलमा आबद्ध नभएका, अन्य दलमा आबद्ध भए पनि ती दलबाट यो देशको हित हुनै सक्दैन भन्ने निष्कर्षमा पुगेका र अन्य विभिन्न सामाजिक संघ-संगठनमा आबद्ध भएर समाजको सकारात्मक रूपान्तरणका लागि काम गरिरहेका सबै नेपालीहरूलाई हामी शान्त, सौम्य, देशभक्तिपूर्ण र विकासमूखी राजनीतिक उभारका लागि हामीले निर्माण गर्न लागेको मञ्च उपयोग गर्न आग्रह गर्दछौं।
विगतका भएका यस्ता वैकल्पिक प्रयास, तिनका कमजोरी र विफलताबारे हामी अनभिज्ञ छैनौं। तिनबाट हामीले पाठ सिकेका छौं – तर्सिएका छैनौं। साथसाथै, हामी अधिकांश पेशागत राजनीतिक पृष्ठभूमिबाट नआएकोले यो यात्रा राजनीतिक पृष्ठभूमिबाट आएकाहरूका लागि भन्दा बढी असहज हुनेछ भन्नेमा हामीलाई कुनै भ्रम छैन। तर सुसूचित तयारीका साथ एउटा प्रतिबद्ध समूहले राजनीतिमा इमान्दार, दूरदृष्टिपूर्ण, सशक्त र राष्ट्रव्यापी हस्तक्षेप नगरी कुनै पनि देशको समष्टिगत रूपान्तरण सम्भव भएको छैन। हामी तयार भयौं – गाउँ-गाउँ, बस्ती-बस्तीमा, अनि विदेशका नगर तथा शहरहरूमा तपाईं पनि तयार रहन हामी हार्दिक आह्वान गर्दछौं। तत्कालका लागि भने देशका हरेक टोल-टोलमा कम्तिमा ७ जना वा संभव भए त्यो भन्दा बढी संख्याको समूह निर्माणका लागि जुट्न हामी विनम्र आग्रह गर्दछौं, जुन छिटै पार्टीको संगठन निर्माणको आधारशिला हुनेछ। विदेशमा बस्ने नेपालीहरूको साथ र सहयोगका लागि हामी विशेष व्यवस्था गर्नेछौं र उनीहरूलाई विदेशका नगर तथा शहरहरूमा ‘सदभाव समूह’हरू निर्माण कार्य तत्काल अगाडि बढाउन हामी हार्दिक अपिल गर्दछौं।
संसारमा हामीभन्दा ज्यादै नै प्रतिकूल अवस्थामा रहेका देशले पनि १० देखि २० वर्षको बीचमा राजनीतिक स्थिरता प्राप्त गर्न र विकासलाई तीव्र गति दिन सकेका छन् भने हामीले नसक्ने कुरै छैन। हामीले शुरु गर्न लागेको यो यात्रा केवल १०/१२ जना सांसदलाई संसद्मा पठाएर “राजनीति” गर्नका लागि होइन – यो देशको नेतृत्व गरेर नेपाली राजनीतिको चरित्र र सिंगो देश नै रूपान्तरण गर्नका लागि हो। तसर्थ हामीलाई विफल हुने या ठीकै मात्र गर्ने सुविधा छैन। यस यात्रामा हामीलाई तपाईंको आशीर्वाद र सहयोग प्राप्त हुनेछ भन्ने हामीले विश्वास लिएका छौं भने तपाईंलाई हाम्रो सहयोग अवश्य मिल्ने नै छ।
यो असाधारण रूपले स्रोत र साधन सम्पन्न तर राजनीतिक कारणले सधैं अस्थिर र अविकसित देशको भविष्य बनाएरै छोड्ने र समृद्ध नेपालका सूचकहरू कुनै पनि हालतमा हेरेरै मर्ने हाम्रो अठोट हो! ताकि, हाम्रा सन्ततिले बुढा बाउ-आमालाई नेपालमा छोडेर आयआर्जन, अलिकति सहज जीवनयापन र वृत्ति विकासका लागि विदेशिनु नपरोस्, बरू तिनले यो देशमा विदेशीलाई समेत रोजगारी दिन सकून्।
रवीन्द्र मिश्र
पूर्व-प्रमूख, बीबीसी नेपाली सेवा
www.facebook.com/rabindramishra.nepal
twitter.com/RabindraMishra
प्रतिक्रिया