चितवन । नारायणगढ–मुग्लिन सडक खण्ड पुस ७ गतेबाट मध्यान्ह ११ बजेदेखि दिउँसो तीन बजेसम्म बन्द हुने भएको छ ।
नारायणगढ–मुग्लिन सडक आयोजनाले बिहीबार सूचना निकालेर यसको जानकारी गराएको हो । अर्को सूचना ननिस्कदासम्म बन्द कायम रहने आयोजनाले जनाएको छ । गत वर्ष माघ अन्तिमदेखि सो सडक यसरी नै बन्द भएको थियो । जुन समय सीमा असारमा मात्रै हटेको थियो । नारायणगढ–मुग्लिन सडक खण्ड विस्तारको काम भइरहेको छ । विस्तारको कामलाई असर नपुगोस् भन्नका लागि सडकमा केही समय यातायात सञ्चालन बन्द नै गर्नुपर्ने अवस्था आएको सडक निर्माण आयोजनाले जनाएको छ ।
‘निकै साघुँरो र जटिल भूबनोटमा रहेको कारण केही समय सडक पूरै बन्द गरेर काम गर्नुपर्ने आवश्यकता छ’ आयोजनाका इन्जिनियर तथा सूचना अधिकारी शिव खनालले भने । चाँडो चाँडो काम गर्नका लागि पनि केही समय यातायात रोकेरै काम गर्नुपर्ने बाध्यता रहेको उनले बताए ।
‘यो सडक देशकै प्रमुख र संवेदनशील सडक हो । निर्माणमा जति ढिलाइ भयो त्यसको असर देश र सर्वसाधारणलाई पर्न जाने भएका कारण चाँडो काम सक्नका लागि पनि यस्तो समय सीमा तोक्नुपर्ने अवस्था सिर्जना भएको हो’ आयोजनाले निकालेको सूचनामा उल्लेख छ । सो सडक राजधानी काठमाडौं र पर्यटकीय सहर पोखरलाई पूर्वी र पश्च्मि नेपालसँग जोड्ने मुख्य मार्ग हो ।
सो सडक भएर दैनिक १० हजारको हाराहारीमा गाडीहरु ओहरदोहर गर्दछन् । निर्माण सुरू भएका कारण ३६ किलोमिटर लामो सडक पार गर्न अहिले पनि घण्टौं लाग्ने गरेको छ ।
सामान्य अवस्थामा पनि ३ घण्टा लाग्ने गरेको सो सडक पार गर्न पहिरो गएमा वा अरु कारणले बाटो अवरुद्ध भएमा दिनभर पनि लाग्छ । निर्माण सुरू हुनुभन्दा पहिले एकदेखि सवा घण्टाभित्र सडक पार हुन्थ्यो ।
दुई वर्षभित्र निर्माण सम्पन्न गर्ने गरेर विभिन्न निर्माण कम्पनीसँग सन् २०१५ को अप्रिलमा सरकारले सम्झौता गरेको थियो । तर, निर्माणमा लक्ष्य अनुरुप काम भएको भने छैन । भूकम्प र नाकाबन्दीका कारण निर्माण सम्पन्न गर्ने नयाँ मित सन् २०१७ को सेप्टेम्बरसम्म पु¥याइएको थियो । नयाँ लक्ष्य अनुरुप पनि सन्तोषजनक काम भएको छैन ।
गएको नोभेम्बरसम्म ३० प्रतिशतको हाराहारीमा काम पूरा भएको छ । जब कि यो अवधिमा लगभग आधा काम पूरा हुनु पर्ने लक्ष्य थियो । एसियाली विकास बैंकको तीन अर्ब रूपैयाँ ऋण सहयोगमा सो सडकलाई एसियाली मापदण्ड अनुरुपको दुई लेनको बनाउने काम सुरू भएको हो । निर्माण कार्यमा भएको विलम्बले चितवनको आर्थिक गतिविधिमा पनि असर गरेको उद्योग वाणिज्य संघको ठहर छ ।
संघको हालै सम्पन्न ५० औं साधारण सभामा सो सडकको निर्माण चाँडै पूरा गर्न विशेष प्रस्ताव गरिएको थियो । झण्डै ४० वर्षअघि तयार भएको सो सडक त्यो बेला दैनिक एक हजार गाडीको चाप थेप्न सक्ने अवस्थालाई ख्याल राखेर निर्माण भएको सम्वद्ध अधिकारीहरुले बताउने गरेका छन् ।
प्रतिक्रिया