न्यूयोर्क, अमेरिका । २०७२ साल वैशाख १२ को महाभूकम्प पीडितको नाममा सहयोग संकलन गरी आफैँले हिनामिना गरेपछि जनसम्पर्क समिति अमेरिकाका पदाधिकारीमा तीव्र विवाद बढेसँगै आफूले खर्च गरेको रकम संस्थामा फिर्ता भएको छ ।
अमेरिका बस्ने प्रवासी नेपालीहरुबाट भूकम्पपीडितको सहयोगका लागि भन्दै उठाइएको रकमम जनसम्पर्क समितिका महासचिव मुनेन्द्र नेम्वाङ र कोषाध्यक्ष विजय थुलुङले आफूखुसी प्रयोग गरेका थिए ।
रकम हिनामिना भए पछि संस्थाको विश्वासनीयतामाथि प्रश्न उठ्नुका साथै त्यसको ब्यापक विरोधसमेत भएको थियो । विरोध भएपछि झस्किएका समितिका पदाधिकारीले आफूले हिनामिना गरेको रकम पुनः संस्थाको खातामा जम्मा गरेका छन् ।
संस्थाका महासचिव मुनेन्द्रले २२ हजार डलर र कोषाध्यक्ष विजयले १० हजार ५०० डलर संस्थाको खातामा फिर्ता गरेका हुन् ।
संस्थाको रकममध्ये ७ हजार ५ सय डलर यसअघि नै काठमाडौँको गागलखेतीका भूकम्पपीडित विद्यालय निर्माणको लागि निकासा गर्ने निर्णय भए पनि विवाद आएपछिमात्रै कोषाध्यक्षले निकासा गरेको पाइएको हो । हिनामिना भएको रकममध्ये अध्यक्ष गोरख विष्टको नाममा काटिएको ५ हजार डलरको चेक पनि कोषाध्यक्ष थुलुंगले अन्यत्रै जम्मा गरेको र आफूले चाँडै फिर्ता गर्ने लिखित जानकारी संस्थालाई दिएका छन् ।
भूकम्प आएलगत्तै अध्यक्ष विष्टको नेतृत्वमा नेपालमा पुगेर सहयोग गरेको संस्थाले नेपालमा ३९ लाख रुपैयाँ नगद र भौतिक सहयोगसमेत गरेको थियो । संस्थाको नाममा रहेको खातामा अध्यक्ष बिष्ट, महासचिव नेम्वाङ र कोषाध्यक्ष थुलुङको संयुक्त नाममा रहेको भए पनि अध्यक्षको जानकारीबिना दुर्इजनाले रकम निकालेको अध्यक्षले थाहा पाएका थिए ।
अध्यक्ष विष्टले रकम हिनामिना भएको खबर सार्वजनिक गरेपछि महासचिव र कोषाध्यक्षले पनि अध्यक्ष विष्टलाई उल्टै आरोप लगाएका थिए । तर अध्यक्षले रकम हिनामिनाबारे छानविन सुरु गरेपछि दुई पदाधिकारीले आफूले हजम गर्न खोजेको रकम पुनः खातामै फिर्ता गराएका हुन् ।
रकम पुनः खातामा आएको पुष्टि गर्दै अध्यक्ष विष्टले आफू सिपिएसँग परामर्शमा रहेको र त्यसपछि सबै हिसाब बाहिर ल्याउने बताएका छन् । प्रायः राजनीतिक रुपमा विवादमा आउने यो समितिले यस पटक भूकम्पपीडितको रकम हिनामिना प्रकरणबाट आफ्नो विश्वसनीयतामाथि गम्भीर प्रश्न उठाएको छ । –एजेन्सी
प्रतिक्रिया