चितवन (माडी )। गोरु काटेको आरोपमा चितवनको माडीबाट प्रहरीले पाँच जनालाई पक्राउ गरेको छ । माडीको चितापुलनजिकै सिसौघारीमा काटेर फ्याँकेको गोरु फेला परेको र बुझ्दै जाँदा उनीहरू संलग्न रहेको भन्ने जानकारीका आधारमा बिहीबार पक्राउ गरिएको प्रहरीले जनाएको छ ।
माडी–३ की सुनिता नेपाली, माडी–४ को १६ वर्षीय सागर नेपाली, सोही ठाउँका १९ वर्षीय शिव नेपाली, माडी–४ का २५ वर्षीय जीवन नेपाली र माडीकै ४५ वर्षीया कोपिला नेपालीलाई पक्राउ गरिएको चितवनका प्रहरी प्रमुख एवम् प्रहरी उपरीक्षक वसन्तबहादुर कुँवरले जानकारी दिए ।
उनका अनुसार उनीहरूलाई अहिले थप अनुसन्धानका लागि जिल्ला प्रहरी कार्यालय चितवनमा ल्याइएको छ । पक्राउ परेकालाई गौबध ऐनअन्तर्गत मुद्दा चलाउने तयारी भइरहेको प्रहरीले जनाएको छ ।
गौहत्याको आरोपमा पक्राउ
यसैगरी, स्याङ्जाको भीरकोट नगरपालिका–१० गगनडाँडामा गौहत्याको आरोपमा पक्राउ परेका एक पुरुषलाई प्रहरीले सार्वजनिक गरेको छ ।
गत सोमबार पाल्नका लागि भनेर लगेको गाईलाई बञ्चरो प्रहार गरी हत्या गर्ने भीरकोट नगरपालिका–१० बस्ने वर्ष ५६ का पदमबहादुर विकलाई वडा प्रहरी कार्यालय वालिङले पक्राउ गरी सार्वजनिक गरेको हो ।
विकले भिरकोट नगरपालिका–२ बस्ने केशव कोइरालाको घरमा रहेको अन्दाजी पाँच वर्षको खैरो रङ्गको गाई पाल्न लैजाने भनी नगद रु ५०० र गाईका लागि चाहिने केही खाद्यान्न लिएको बुझिएको प्रहरी निरीक्षक उत्तमप्रकाश बरालले बताए ।
गाईको परीक्षण गरी पुरिएको र निज पदमबहादुर विकलाई जिल्ला अदालत स्याङ्जाबाट छ दिनको म्याद थप गरी अनुसन्धान जारी राखिएको प्रहरीले जनाएको छ । मुलुकी ऐन चौपायाको महलको दफा ११ मा जानी जानी गाई गोरु मार्नेलाई १२ वर्ष र मार्नका लागि वचन दिनेलाई छ वर्षको कैद सजायको व्यवस्था रहेको छ । रासस
प्रतिक्रिया