अभिनेता भुवन केसीको सिको गर्दै उनकी पूर्व श्रीमति सुष्मिता बमजन पनि फिल्म निर्माणमा ओर्लिएकी छिन् । उनको अभिनयसँगै निर्माण समेत गरेको फिल्म ‘म त तिम्रै हुँ’को सोमबार एक कार्यक्रमका बीच ट्रेलर सार्वजनिक गरियो । निर्मातामा उनले छोरा अनमोलको नाम राखेपनि अनमोल यसमा लाइन प्रोड्युसर मात्र हुन् ।
सोमबार काठमाडौंको क्युज सिनेमा हलमा आयोजित कार्यक्रममा सुष्मिता केसीले फिल्म युवा दर्शक लक्षित रहेको बताइन् ।
फिल्मलाई श्रीराम महतले निर्देशन गरेका हुन् । डकुमेन्ट्री र छोटा फिल्मको अनुभवलाई उनले ठूलो पर्दामा बिस्तार गरेका हुन् । उनले फिल्मले अहिलेको पुस्ताको दैनिकीलाई प्रतिबिम्बित गर्ने बताए ।
फिल्ममा सुष्मिता बाहेक अधिकांश नयाँ कलाकारको अभिनय रहेको छ । यही फिल्मबाट आकाश श्रेष्ठ र ज्योत्स्ना योगीले रजतपटको यात्रा थालेका हुन् । ट्रेलरले रोमान्स र आँशुको मिश्रणलाई प्रस्तुत गरेको छ ।
कृष्ण आचार्यको लेखन रहेको फिल्ममा हरकुलिश बस्नेतको संगीत रहेको छ । फिल्ममा बालनरसिंह राणा, विश्व बस्नेतको पनि अभिनय रहेको छ ।
फिल्मले आमा छोराको सम्बन्धको कथा पेश गर्छ । फिल्म साउन १० गते प्रदर्शन हुनेछ ।
प्रतिक्रिया