मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

ग्लोबल   

अमेरिकाको टेक्सस बाढीले प्रभावित, नेपालीहरु सुरक्षित

अमेरिकाको टेक्सस बाढीले प्रभावित, नेपालीहरु सुरक्षित


हिमालयखबर संबाददाता-
ह्युस्टन (अमेरिका) । अमेरिकाको दक्षिणी शहर ह्युस्टनमा ४० वर्षको अवधिमा सबैभन्दा ठूलो बाढी आएको छ । झण्डै १५  हजार नेपालीको बसोबास रहेको ह्युस्टन शहरको रोशनवर्ग र रिचमण्ड शहर पुरै जलमग्न भएको छ । बुधबारदेखिको लगातार वर्षाले अमेरिकाका दक्षिणी राज्यहरु टेक्सस, ओक्लाहोमा, लुजियाना सर्वाधिक प्रभावित भएका छन् ।
 
बाढीले ह्युस्टनको रोशनवर्ग र रिचमण्डमा सयौं परिवारहरु विस्थापित भएका छन् । स्थानीय समाचारमाध्यमहरुले जनाए अनुसार यस्तो बाढी र वर्षा ह्युस्टनमा ४० वर्षको अवधिमा पहिलोपटक आएको हो ।
 
ह्युस्टनका धेरै राजमार्गहरु बाढीले गर्दा स्थानीय सरकारले बन्द गरेका छन् । फोर्टबेण्ड र ब्राजोरिया काउण्टी बाढीले सबैभन्दा बढी प्रभावित छन् । त्यस्तै, ग्रेटर ह्युस्टनको स्प्रिंग, किंग्सउड, पास्देना, रोजनवर्ग, साइप्रेस र रिचमण्ड बाढीले प्रभावित हुन पुगेका छन् ।
 
मौसम विभागले जनाए अनुसार शुक्रबारसम्म भारी वर्षा जारी रहनेछ । त्यतिन्जेलसम्म सुरक्षित हुन स्थानीय सरकारी निकायहरुले अपिल गरेका छन् । 
 
नेपालीहरुको सबैभन्दा ठूलो बसोबास रहेको ड्यालसमा पनि विहीबारको वर्षाले धेरै ठाउँको जनजीवन प्रभावित बनाएको छ । मौसम विभागले स्थानीयवासीहरुलाई मोबाइलफोनमा सन्देश पठाउँदै सतर्क रहन अपिल गरेको थियो । ड्यालसको डिएफडब्ल्यू अन्तर्राष्ट्रिय विमानस्थलमा विहीबार दिउँसो झण्डै दुई इन्च पानी जमेका थियो । 
 
फोर्डहुडमा उद्धारका निम्ति गएका सैनिक गाडीलाई समेत बाढीले बगाएको थियो । उक्त घटनामा तीन सैनिकको निधन हुनुका साथै ६ जना हराईरहेका छन् । अरु तीन सैनिकको उद्धार गरिएको थियो । फोटो साभार: सामाजिक संजाल