अहिलेसम्मकै महंगो बजेटमा निर्माण गरिएको नेपाली फिल्म ‘कालो पोथी’ बुधबार बेलुकी प्रिमियर गरिएको छ । फिल्मले तारिफ पाए पनि व्यवस्थापन भद्रगोल भएपछि पत्रकारले भने चित्त दुखाए । एसएमएसमा निम्तो पाएका पत्रकारले टिकट लिन निकै पापड बेल्न पर्यो तर मेगा बैंकका लागि भने बेग्लै स्थान व्यवस्था गरेर टिकट दिईएको थियो ।
७२ औं अन्तर्राष्ट्रिय भेनिस फिल्म फेस्टिभलमा फिल्मले ‘क्रिटिक्स विक’ तर्फ उत्कृष्ट फिल्मको अवार्ड जितेको थियो । त्यसयता फिल्मले अर्को महत्वपूर्ण अवार्ड जितेको छैन तर २५ भन्दा बढी अन्तर्राष्ट्रिय फिल्म फेस्टिभलमा सहभागिता जनाईसकेको छ ।
प्रिमियरमा फिल्म हेर्ने सबैले फिल्मलाई अग्र्यानिक रहेको प्रतिक्रिया दिए । त्यसमा पनि खासगरी फिल्ममा अभिनय गरेका दुई बाल कलाकार शुक्रराज रोकाया र खड्ग नेपालीको अभिनयले धेरैलाई प्रभावित तुल्याएको थियो । फिल्ममा विपिन कार्की, बेनिशा हमाल, जित बहादुर मल्ल, हन्सा खड्का आदिको पनि अभिनय रहेको छ । फिल्मले पोथी पालेर सपना पूरा गर्ने लक्ष्य राखेका दुई बालकको पोथी हराएपछि खोज्न जाने क्रममा साक्षात्कार हुने घटनालाई देखाईएको छ ।
फिल्म तीन करोडको लागतमा बनेको हो । जसमध्ये अधिकांश पैसा फिल्मले निर्माण अगावै विभिन्न देशबाट जितेको थियो ।फिल्मलाई मीनबहादुर भामले निर्देशन गरेका हुन् । फिल्म यही शुक्रबारबाट देशभर लाग्दैछ ।फोटो: बिनोद पोखेरल
प्रतिक्रिया