चितवन । राष्ट्रिय गणतन्त्र दिवसको अवसरमा भरतपुर कारागारबाट ११ जना कैदीलाई बाँकी रहेको कैद माफी मिनाहा गरी रिहा गरिएको छ । जसमा २ महिला र ९ परुषको कैद मिनाहा भएको भरतपुर कारागारका नासु रामबाबु श्रेष्ठले जानकारी दिए ।
कैद मिनाहा पाउनेमा कर्तव्य ज्यान मुद्दाका मात्र ६ जना रहेका छन् । जसमा सबैभन्दा बढी चितवनकी सरस्वती तिमिल्सिनाको १२ वर्ष ३ दिन कैद मिनाहा भएको छ । उनले ८ वर्ष ५ महिना २७ दिन कैद भुक्तान गरिसकेकी छन् । ताम्लेजुङ ठेगाना भएका आकाश भनिने हर्कबहादुर सार्कीको ११ वर्ष ११ महिना १२ दिन कैद छुट भएको छ । कर्तव्य ज्यानको मुद्दा लागेका उनले ८ वर्ष १८ दिन कैद भुक्तान गरिसकेका छन् ।
नुवाकोटका पूर्णबहादुर सुनारको ११ वर्ष ३ महिना १३ दिन कैद माफी भएको छ । उनले ८ वर्ष १८ महिना १७ दिन कैद सजाय भोगेका छन् । कर्तव्य ज्यानकै मुद्दामा कारावासको सजाय भोगिरहेका भारतका महमद मुकिमको ११ वर्ष २ महिना २९ दिन कैद मिनाहा भएको हो ।
त्यस्तै कर्तव्य ज्यान मुद्दामा १० वर्ष ३ महिना २८ दिन कैद भुक्तानी गरिसकेका कल्पना शाहीको बाँकी ९ वर्ष ८ महिना २ दिन कैद मिनाहा भएको छ । यस्तै ४ वर्ष ८ महिना १२ दिन सजाय भोगिसकेका चितवन घरका राजन सापकोटाको बाँकी ५ वर्ष ३ महिना १८ दिन कैद मिनाहा भएको श्रेष्ठले बताए ।
त्यस्तै कारागारबाट ज्यान मार्ने उद्योगको मुद्दाका २ जना, सवारी ज्यान मुद्दाका २ जना तथा नकवजनी चोरी मुद्दा लागेका एक जनाको कैद मिनाहा भएको छ ।
ज्यान मार्ने उद्योगको मुद्दाका कुल ५ वर्षको कारागार सजाय भोगिरहेका चितवन निवासी झलबहादुर विकको २ वर्ष १ महिना २ दिन र सुनिल महतोको २ वर्ष ९ महिना ६ दिन कैद मिनाहा भएको हो । सवारी ज्यान मुद्दाका चितवनका विष्णुहरि सेढाईंको १ महिना २१ दिन तथा शिशिर अधिकारीको ८ महिना १८ दिन कैद मिनाहा भएको उनले बताए । नकवजनी चोरी मुद्दा लागेका पर्वत स्थायी घर भएका हापु भनिने राज सेन्चुरी सुनारको १० महिना १४ दिन कैद मिनाहा भएको नासु श्रेष्ठले बताएका छन् ।
गणतन्त्र दिवसको दिनमा कैद माफ पाएका देशका ८ सय ६४ कैदीमध्ये चितवनका ११ कैदीले कैद माफी पाएका हुन् ।
प्रतिक्रिया