मेलम्ची (सिन्धुपाल्चोक) । हाँस्य कलाकार सिताराम कट्टेल (धुर्मुस) र कुञ्जना घिमिरे (सुन्तली) ले दोश्रो एकिकृत बस्तीको शिलान्यास गरेका छन् । गत वर्ष भूकम्प गएको ठ्याक्कै एक वर्ष पुगेको समय आइतबार ११ बजेर ५६ मिनेटमा उनीहरुले मेलम्ची–८ गिरानचौरमा दोश्रो एकिकृत बस्तीको शिल्यान्यास गरेका हुन् ।
बस्ती निर्माणको काम थालनीस्वरुप गिरानचौर एकिकृत बस्तीमा सामुदायिक भवनको जग शिलान्यास गरिएको हो । यस अघि विभिन्न व्यक्ति, संघसंस्थाको सहयोगमा धुर्मुस सुन्तलीले काभ्रेको डाँडागाउँमा पहिलो एकिकृत नमुना बस्ती बनाएका थिए । गिरानचौरमा रहेका ६५ परिवारका लागि करीब ६ महिना भित्र एक घर, एक धारा, एक चर्पी, एक बगैँचालगायतका संरचना निर्माण गरेर हस्तान्तरण गर्ने फाउण्डेशनको लक्ष्य रहेको कट्टेल उफ ‘धुर्मुस’ले हिमालय खबरसँग बताए ।
गिरानचौर एकिकृत बस्तीलाई बालमैत्री, वातावरणमैत्री र पर्यटकीय पनि बनाइने फाउण्डेशनले जनाएको छ । पुननिर्माणमा ढिलाइ भइरहेकाले सरकारलाई सघाउने उद्देश्यले नयाँ नमुना बस्ती बनाउने अभियानमा लागिएको उनले बताए । धन नभए पनि ठूलो मन लिएर बस्तीको शिल्यान्यास गरेको बताउँदै उनले सहयोगी हातहरुको खाँचो रहेको औँल्याएका छन् ।
गिरानचौर एकिकृत बस्ती निर्माणको काम थालनी गदै गर्दा उनले पहिलो एकिकृत बस्ती बसाउन सहयोग गर्ने सम्पूर्ण व्यक्ति, संस्थाहरुलाई पनि धन्यवाद दिएका छन् । देश विदेशबाट सहयोग गर्ने केहि प्रतिबद्धताहरु आउन थालेकोमा खुशि व्यक्त गर्दै उनले तिनै प्रतिबद्धताका कारण काम गर्ने आँट पलाएको जनाएका छन् । साढे तीन करोड अनुमानीत लागत रहेको यो बस्ती निर्माणको थालनी गर्दा अहिले फाउण्डेशनको खातामा जम्मा १ लाख ७४ हजार रुपैँया मात्र रहेको फाउण्डेशनकी कोषाध्यक्ष कुञ्जना घिमिरेले बताएकी छिन् ।
मनदेखि आँटेको काम पुरा गर्न मनकारी मान्छे, संघसंस्थाहरु भेटिने आशामा गिरानचौर एकिकृत बस्ती बसाउन आफूहरु अघि सरेको उनको भनाई छ । सामाजिक काम गर्न पाउँदाको खुशि अन्य कुनै पनि कामबाट प्राप्त हुन नसक्ने भएकाले ६५ परिवार भूकम्प पीडितको दुख कम गर्न लागि परेको उनी बताउँछिन् । भूकम्प पिडितको घाउमा मलहम लगाउने यस अभियानमा साथ दिन उनले सबैमा अपिल गरेकी छिन् । आर्थिक रुपमा सहयोग गर्न नसक्नेहरुले श्रमदान मार्फत पनि बस्ती निर्माणमा सहयोग गर्न सकिने फाउण्डेशनले जनाएको छ ।
एकसय रोपनी जग्गामा एकै आकार र रंगका ६५ वटा घर बनाएर हस्तान्तरण गर्ने योजनामा फाउण्डेसन छ । घरको रंग रातो, सेतो र निलो हुनेछ ।
प्रतिक्रिया