नयाँ दिल्ली । दक्षिण भारतमा रहेको एक मन्दिरमा आइतबार भएको भीषण आगलागीमा परी मृत्यु हुने व्यक्तिको सङ्ख्या १०२ पुगेको छ ।
भारतको केरेलाराज्यको तटीय सहर पारवुरामा रहेको पुत्तिङ्गल देवीको मन्दिरमा हिन्दू नयाँ वर्षको उपलक्ष्यमा भएको आतसबाजीमा यो आगलागी भएको बताइएको छ ।
मन्दिर परिसरमा जम्मा भएका व्यक्तिबीच भएको यस आगलागीमा परी १०२ व्यक्तिको मृत्यु हुनुका साथै अन्य ३५० भन्दा बढी व्यक्ति घाइते भएका छन् ।
स्थानीय समयानुसार आइतबार बिहान ४ बजे सुरु भएको यस आगलागीमा सुरुमा ५० जनाको मृत्यु भएको बताइएको थियो भने पछि यो सङ्ख्या बढेर १०२ पुगेको हो ।
अग्निी नियन्त्रक र प्रहरी आगलागी नियन्त्रण तथा घाइतेहरुको उद्धारका लागि सङ्घर्षरत रहेका बताइएको छ । हाल स्थिति नियन्त्रणमा आएको केरेलाका गृहमन्त्री रमेश चेन्नीथालाले भारतीय टेलिभिजन च्यानल एडिटिभीलाई जानकारी दिनुभएको छ ।
आगलागीमा परेर घाइते भएकाहरुमा केहीको अवस्था चिन्ताजनक भएको हुनाले मृतकको सङ्ख्या बढ्न सक्ने प्रहरीले अनुमान गरेका छन् ।
भारतीय प्रधानमन्त्रीद्वारा भ्रमण
यसैबीच, भारतीय प्रधानमन्त्री नरेन्द्र मोदी आइतबार केरेलाराज्यको तटीय सहर पारवुरामा रहेको पुत्तिङ्गल देवीको मन्दिरमा जाँदै हुनुहुन्छ ।
मन्दिरमा आइतबार बिहान सबेरै भएको आगलागीमा परी कम्तीमा १०२ व्यक्तिको मृत्यु हुनुका साथै अन्य ३५० भन्दा बढी घाइते भएका छन् । एएफपी / सिन्ह्वा
प्रतिक्रिया