काठमाडौँ, १ फागुन । एकीकृत नेकपा (माओवादी) का अध्यक्ष पुष्पकमल दाहालले एकाध दिनभित्रै माओवादी घटकबीच एकताको प्रक्रिया अगाडि बढ्ने बताउनुभएको छ ।
पार्टी केन्द्रीय कार्यालय पेरिसडाँडामा ‘२१औँ जनयुद्ध दिवस’को अवसरमा आज आयोजित कार्यक्रममा उहाँले विभिन्न टुक्रामा विभक्त भएर बस्दा माओवादी आन्दोलन नै समस्यामा पर्न थालेको र त्यसले नेपालको कम्युनिस्ट आन्दोलनसमेत नकारात्मक दिशातिर जाने हो कि भन्ने आशङ्का बढेकाले एकता हुने विश्वास व्यक्त गर्नुभयो ।
माओवादी घटकले आफूले विगतमा गरेका सबै गल्ती सच्याएर अगाडि बढ्न तयार भएको उल्लेख गर्दै उहाँले अब एकता प्रक्रियालाई कोही कसैले पनि रोक्न नसक्ने स्पष्ट पार्नुभयो ।
माओवादीले सञ्चालन गरेको सशस्त्र सङ्घर्षको बलमा नै २०६२÷६३ को आन्दोलन भएको उल्लेख गर्दै उहाँले संविधानसभाबाट संविधान जारी भएको तथा जनताका अधिकारसमेत संस्थागत भएकाले बाँकी अधिकार प्राप्तिका लागि अझै सङ्घर्षको जरुरी रहेको बताउनुभयो ।
पार्टी एकताका लागि आफूले मोहन वैद्य, मणि थापा, मातृका यादव र नेत्रविक्रम चन्द सबैसँग कुरा गरेको उल्लेख गर्दै एकाध दिनमा नै त्यसको सकारात्मक परिणाम आउने विश्वास व्यक्त गर्नुभयो ।
जनयुद्ध दिवसको अवसरमा सबै माओवादी घटकबाट पार्टी एकताको पक्षमा सन्देश दिनु र सोही आशयको वक्तव्य दिनु जायज भएको भन्दै उहाँले वातावरण क्रमशः सकारात्मक बनेको छ भन्नुभयो ।
अध्यक्ष दाहालले मुलुक, जनता र माओवादी आन्दोलनलाई अगाडि बढाउन पनि सबै क्रान्तिकारी कम्युनिस्ट शक्ति एकै ठाउँमा आउनै पर्नेमा जोड दिनुभयो ।
एमाओवादीका सचिव एवम् उपप्रधानमन्त्री तथा ऊर्जामन्त्री टोपबहादुर रायमाझीले माक्र्सवाद र माओवादको सबैभन्दा बढी व्याख्या गर्ने डा बाबुराम भट्टराईले क्रान्ति र पार्टी नै परित्याग गरेर धोका दिएको बताउनुभयो ।
एमाओवादी नै नयाँ शक्ति भएको उल्लेख गर्दै उहाँले धनी र गरिबबीचको खाडल बढाउने आर्थिक विकासले कोही कसैको हित नगर्ने भएकाले आफूहरूले अगाडि सारेको समाजवादी क्रान्तिको ढाँचा नै वास्तविक र यथार्थको नजिक रहेको उल्लेख गर्नुभयो ।
कार्यक्रममा प्रवक्ता दीनानाथ शर्मा, स्थायी समिति सदस्य जनार्दन शर्मा र अखिल नेपाल टे«ड युनियन महासङ्घका अध्यक्ष शालिकराम जमरकट्टेलले पार्टीले अवलम्बन गर्नुपर्ने कार्यनीति र जनयुद्ध दिवसको महत्वमाथि जानकारी गराउनुभएको थियो ।
यस्तै, नेत्रविक्रम चन्द नेतृत्वको नेकपा माओवादीले पनि आज राजधानीमा प्रदर्शन गरेको छ । काठमाडौँको सहिदगेट, सुनधारा, वीर अस्पताल हुँदै शान्तिवाटिकामा पुगेर ¥याली समापन भएको थियो । शान्तिवाटिकामा आयोजित सभालाई माओवादीका महासचिव चन्द, नेताहरू धर्मेन्द्र बास्तोला, खड्गबहादुर विकलगायतका नेताहरूले सम्बोधन गर्नुभएको थियो ।
राज्य सत्ता परिवर्तन गर्ने भन्दै तत्कालीन नेकपा (माओवादी)ले २०५२ फागुन १ गतेदेखि सशस्त्र सङ्घर्ष गरेको थियो । विसं २०६३ मङ्सिर ८ गते शान्ति सम्झौतासँगै सशस्त्र सङ्घर्ष अन्त्य भएको थियो । शान्ति प्रक्रियामा आएको १० वर्ष नबित्दै सो माओवादी पार्टी चार टुक्रामा विभाजित भएको छ । रासस
प्रतिक्रिया