चितवन, २१ माघ । एक महिनाअघि भरतपुर उपमहानगरपालिकाको नगरपरिषद्ले नगरभित्र बन्ने संरचनाको नक्सा पास अनिवार्य गर्दै पर्खालसमेत बिना स्वीकृति बनाउन नपाइने निर्णय ग¥यो ।

तर, उपमहानगरपालिकाको कार्यालयनजिकै नहरको डिलमा एउटा भवनबिना नक्सा पास बन्दै छ । जिल्ला प्रहरी कार्यालयले त्यहाँ प्रहरी बिट बनाउँदै छ ।

नारायणी लिफ्ट सिंचाइ आयोजनाको नहरको जग्गामा भवन बनाउँदा प्रहरीले लिखित स्वीकृति पनि लिएको छैन । ‘आवश्यक प¥यो भन्नु भयो । समुदायको सुरक्षाका लागि भवन बनाउने हो भनेपछि हामीले हुन्छ भनेका छौं । मौखिक रुपमा आग्रह भयो ।

मौखिक रुपमै हुन्छ भनियो । त्यस्तो लिखित केही गरिएन’ नारायणी लिफ्ट सिंचाइ आयोजनाका प्रमुख खेमबहादुर पाठकले भने ।

सुरक्षा समितिको बैठकले प्रहरी बिट राख्ने निर्णय गरेपछि आफूहरुले निर्माण कार्य सुरू गरेको चितवन जिल्ला प्रहरी कार्यालयका प्रहरी उपरीक्षक वसन्त कुँवरले बताए । ‘त्यस क्षेत्रमा एउटा प्रहरी पोष्ट चाहियो भन्ने सर्वसाधरणको माग थियो । हामीले सरकारी जमिनमै बिट निर्माण गर्न लागेको हो’ प्रहरी उपरीक्षक कुँवरले भने ।

उपमहानगरपालिकाले नक्सा पासको कुरा गरेकोसमेत उनले बताए । ‘उपमहानगरपालिकाका कार्यकारी अधिकृतले नक्सापास नभए काम रोक्नु पर्छ भन्दै हुनु हुन्थ्यो । लालपूर्जा भएको जग्गा हामीसँग छैन नभएको जग्गाको नक्सा पास हुँदैन । तर आवश्यक भएका कारण बनाउनै पर्ने भएको हो’ प्रहरी उपरीक्षक कुँवरले भने ।

प्रहरी बिट बनेमा ओहरदोहर गर्ने बाटोसमेत अवरुद्ध हुने भन्दै स्थानीय टोल विकास संस्थाले निर्माण कार्य रोक्न उपमहानगरपालिकामा निवेदन दिएको थियो ।

‘टोल विकास संस्थाबाट उजुरी आएको हो । त्यस ठाउँमा बन्ने भवनको नक्सा पास हुने सम्भावना नै रहँदैन । मैले यही कुरा भनेको हो’ भरतपुर उपमाहनगरपालिकाका कार्यकारी अधिकृत महेश बरालले भने ।

टोल विकास संस्थाका पदाधिकारीहरु नारायणी लिफ्ट सिंचाइ कार्यालयमा पनि पुगेका थिए । ‘टोल विकासका मान्छेहरु आएका थिए । मैले त तपाइँहरुको सहमति र आग्रहमा बिट बन्दै गरेको होला भन्ने लागेको थियो त्यस्तो हो भने नगरपालिकामा गएर कुरा राख्नुहोस भनेर उहाँहरुलाई पठाए’ कार्यालय प्रमुख पाठकले भने ।

प्रहरीले अस्थायी रूपमा बिट बनाउन लागेको हुँदा विरोध गर्नु ठिक नभएको प्रहरी उपरीक्षक कुँवरले बताए । ‘बाटो अवरुद्ध हुने गरेर भवन बनेकै छैन । हामीहरुले जनताको सुरक्षाका लागि बिट राख्न खोज्दा उहाँहरुले किन विरोध गर्दै हुनुन्छ अचम्म लागेको छ’ प्रहरी उपरीक्षक कुँवरले भने ।

स्थानीय नागरिक भिलेज टोल सुधार समितिले प्रहरी बीट त्यहाँ बनेमा शाखा बाटोहरुबाट भरतपुरको उकालो निस्कन अवरोध हुने भन्दै निर्माण रोक्न माग गर्दै माघ १७ गते वडा नं. ४ को कार्यालयमा निवेदन दिएको थियो । वडा कार्यालयले निवेदकको व्यहोरा मनासिब रहेको भन्दै थप कारबाही गर्न उपमहानगरपालिका कार्यालयलाई सोही दिन सिफारिस गरेको थियो ।