चितवन, ७ माघ । चितवन हुँदै भारतको विभिन्न भागमा बेचबिखन गर्न ४ महिलालाई लैजादै गर्दा चितवन प्रहरीले ४ पुरुषलाई पक्राउ गरेको छ ।
उनीहरुलाई भरतपुर उप–महानगरपालिका–१० स्थित होटल अशोकाबाट पक्राउ गरिएको हो । उनीहरुसंगै रहेका रामेछापका १९ देखि ३१ वर्ष उमेर समूहका ४ जना महिलालाई प्रहरीले उद्धार गरेको छ ।
पक्राउ पर्नेहरुमा चितवन मँगलपुर ७ बस्ने बर्ष ३७ का सञ्जय तमाङ्ग, तनहुँ केशवटार २ बस्ने बर्ष ३७ का टोलाराम थापा, धादिङ्ग गजुरी २ बस्ने बर्ष ४२ का दयाराज कँडेल र स्याङ्गजा पंचमुल गाविस वडा नं ९ बस्ने बर्ष ४४ का राजु गुरुङ्ग रहेका छन् ।
कँडेललाई काठमाडौंबाट पक्राउ गरिएको हो भने बाँकी ३ जनालाई चितवनबाटै पक्राउ गरिएको जिल्ला प्रहरी कार्यालय चितवनका प्रहरी नायव उपरीक्षक राजन अधिकारीले जानकारी दिनुभयो ।
प्रहरीले दिएको जानकारी अनुसार ती ४ जना महिलाहरुलाई रोजगारीको लागी किर्गिजिस्तान पठाई दिने भनि ललाई फकाई प्रलोभनमा पारी काठमाण्डौंमा भेला जम्मा गरी नारायणगढसम्म बसमा ल्याई महेन्द्रनगरको बाटो हुँदै भारतको बिभिन्न शहरमा पु¥याई बेचबिखन गर्ने उद्देश्यले भरतपुर स्थित होटल अशोकामा ल्याई राखिएको थियो । त्यहाँबाट महेन्द्रनगर लैजान लाग्दा जिल्ला प्रहरी कार्यालयबाट खटिएको प्रहरी टोलीले फेला पारेको थियो ।
पक्राउ परेकाहरुलाई बुधबार मानव बेचबिखन तथा ओसारपसार (नियन्त्रण) ऐन, २०६४ अन्तर्गत मुद्दा दर्ता गरी चितवन जिल्ला अदालतबाट अनुमती लिई प्रहरी हिरासतमा राखी थप अनुसन्धान कार्य भई रहेको प्रहरीले जनाएको छ ।
प्रतिक्रिया