बनेपा, २९ पुस । न्यानो कपडाका लागि भूकम्पपीडितले पाउने भनिएको रु १० हजार काभ्रेपलाञ्चोकका तीन नगरपालिका र छ गाविसमा अझै वितरण हुन सकेको छैन ।
जिल्लाको बनेपा, पनौती, पाँचखाल नगरपालिका, गैरीविसौना देउपुर, पोखरीनारायणस्थान, टुकुचानाला, ¥याले, सिपाली चिलाउनेलगायत छ गाविसमा रकम निकासा नभएकाले वितरणमा कठिनाइ भएको जिल्ला प्रशासन कार्यालय, काभ्रेपलाञ्चोकले जनाएको छ ।
अब केही दिनमा निकासा होला, लगत्तै वितरण गर्छौं काभ्रेपलाञ्चोकका प्रमुख जिल्ला अधिकारी मदन भुजेलले भन्नुभयो । उहाँले मेच्छे र मङ्गलटार गाविसमा दुई हजार ४०८ परिवारलाई न्यानो कपडाका लागि रु तीन करोड निकासा भएको जानकारी दिनु भयो ।
जिल्ला प्रशासन कार्यालयका लेखा अधिकृत भीमप्रसाद पोखरेलले छ गाविस र तीन नगरपालिकाका २१ हजार ४९० जनालाई न्यानो कपडाका लागि रकम अभाव भएको उल्लेख गर्दै उनीहरुका लागि रु २३ करोड ८९ लाख ८० हजार आवश्यक भएको बताउनुभयो ।
उहाँका अनुसार वितरण गर्न बाँकी रहेको रकममध्ये सबैभन्दा बढी पाँचखाल नगरपालिकामा रु आठ करोड ८७ लाख ६० हजार, पनौती नगरपालिकामा रु चार करोड ६१ लाख ९० हजार र बनेपा नगरपालिकमा रु एक करोड ५० लाख ८० हजार वितरण गर्नुपर्ने छ ।
प्रशासनले अहिलेसम्म न्यानो कपडाका लागि भूकम्पपीडितलाई जिल्लामा रु ५६ करोड वितरण गरिसकेको छ । सरकारले पुस २४ गतेसम्म न्यानो कपडाका लागि रु १० हजार वितरण गर्न अन्तिम समयसीमा तोकेको थियो । काभ्रेपलाञ्चोकमा भूकम्पका कारण ८३ हजार २२४ घर पूर्णरुपमा क्षति भएको छ । रासस
प्रतिक्रिया