काठमाडौँ, २६ पुस । पूर्वराजा ज्ञानेन्द्र शाहले राष्ट्रहित र राष्ट्रवासीको सुख, समृद्धि र आत्मीय सन्तुष्टिका निम्ति जनताको नासो जनतालाई सुम्पेर दरबार छाडेको बताएका छन् ।
९४ औं पृथ्वी जयन्तीको अवसरमा आइतबार एक वक्तव्य जारी गर्दै शाहले मुलुकमा पछिल्लो समयमा देखिएको भीषण संकटप्रति चर्को असन्तुष्टिसमेत जाहेर गरेका छन् । वक्तव्यमा शाहले भनेका छन्ः ‘अब नेपाली जनताले को र कसबाट के कस्तो दायित्व र भूमिका र भरोसा चाहेका छन्, खुलस्त हुनुपर्छ भन्ने समयको माग रहेको छ । सबैले विचार गर्नुपर्ने कुरा यो हो कि मैले नेपाली घरबार छोडेको छैन, अनि नेपाल र नेपालीको आधारको भार पनि परित्याग गरेको छैन ।’
पृथ्वी जयन्तीको यस ऐतिहासिक क्षणमा सँधै नै नेपालीहरुमा मिलिरहने चेतना र प्रेरणाको कुरा राष्ट्रिय एकता र सदाशयतानै भएको बताउँदै शाहले हिमाल, पहाड र तराईका हामी सवै नेपाली यही फुलवारीमा जति बढी समाहित हुन सकिन्छ उतिनै गौरवशाली अस्तित्व र स्वाभिमानको नेपालीत्व उच्च रहने बताएका छन् ।
पछिल्लो युगमा यति बृहत चेतना भएका हामी नेपालीहरु दिग्भ्रमित भएको बताउँदै उनले भनेका छन्ः ‘सोचनीय कुरा के छ भने अहिले देशभित्र विधि, व्यवस्था, भूरचना र शासन प्रशासनका कुरालाई लिएर जे जस्ता बखेडा खडा भएका छन्, यो कदापी राम्रो कुरा होइन ।
आपसी सदभाव खलबलिएर जनसाधारणको जीवन व्यवहारमा जस प्रकार आर्थिक संकट, चरम महंगी, अभाव, अनुत्पादन र बाहिरी निर्भरताबाट यतिखेर थप मार परिरहेको छ ।’ पछिल्लो वर्तमान संकटप्रति चिन्तित हुँदै उनले थप भनेका छन् : ‘नेपाली जनताले अहिले साँझ बिहान छाक टार्न र सामान्य रुपले जीवन धान्न पनि धौ धौ परिरहेको अवस्था छ, त्यो गम्भीर चिन्ताको विषय हो ।’
प्रतिक्रिया