काठमाडौँ, २१ पुस । काठमाडौँ, पोखरालगायतका विभिन्न स्थानमा चिकित्सक तथा प्रहरी नायव महानिरीक्षक (डिआइजी)को छोरी हुँ भन्दै ठगी गर्दै हिँडेकी भगवती केसीलाई महानगरीय अपराध महाशाखाले सार्वजनिक गरेको छ ।
गुल्मी, हस्तिचौर–९ की २३ वर्षीया केसीले चिकित्सक सुहाना, अदिती, सृष्टीलगायतका नक्कली नामको प्रयोग गरी विभिन्न कलाकर्मी, युवा तथा होटल व्यवसायीलाई ठगी गर्दै आएको आरोपमा महाशाखाको टोलीले उनलाई हिजो सिनामङ्गलबाट पक्राउ गरेको हो ।
उनले ठगी गर्नका लागि चिकित्सक सुहाना केसीको नाममा नक्कली आइडी, फेक भाइबर नम्बर प्रयोग गर्नुका साथै विभिन्न व्यक्तिका कागजपत्र र फोटो राखी नेपाल टेलिकम र एनसेलका सिमको प्रयोग गर्ने गरेको, विभिन्न होटलमा गई म डिआइजी सनत केसीको छोरी हुँ भनी परिचय दिई होटलको बिल नतिरी ठगी खाने गरेको र विभिन्न व्यक्तिलाई म डिआइजी हुँ मेरो छोरीको रेखदेख गरिदिनु भनी फोन गर्न लगाउने गरेको पाइएको प्रहरीले जनाएको छ ।
अभियुक्त केसीले एक वर्षअघि पोखराका विभिन्न अस्पतालमा चिकित्सक बनेर बिरामीको जाँच गरेको बहाना बनाउनुका साथै चिकित्सकसँग समेत विवाह गर्ने भन्दै सँगै बसी ठगी गर्दै आएको र सोबारे पोखराको स्थानीय पत्रिकाले समाचार प्रकाशन गरेपछि उनी काठमाडौँ छिरेको प्रहरीले बताएको छ ।
काठमाडौँ आएपछि पनि उनले विभिन्न चिकित्सक, युवक तथा होटलमा ठग्दै आएको बुझिएको छ । प्रहरीले उनले प्रयोग गर्ने ९ वटा मोबाइल नम्बरसमेत सार्वजनिक गरेको छ ।
प्रहरीको अनुसन्धानबाट खुलेका कुराहरु :
१. ठगी गर्नको लागि डाक्टर सुहाना केसी नामको नक्कली फेसबुक आइडी, नक्कली भाइवर नम्बर प्रयोग गर्नुका साथै विभिन्न व्यक्तिहरुको कागजपत्र र फोटो राखी एनटिसी र एनसेलका सिमहरु प्रयोग गर्ने गरेको ।
२. विभिन्न होटलमा गई आफूलाई डिआइजी सनत केसीको छोरी हूँ भनि परिचय दिई होटलको बिल नतिरी ठगी खाएको, बिभिन्न स्टोरबाट सामान लिई ठगी गरेको, अन्य ब्यक्तिलाई म डिआइजी हुँ मेरो छोरीको रेख देख गरिदिनु भनि फोन गर्न लगाएको ।
३. १ वर्ष अगाडी पोखराका विभिन्न अस्पतालहरुमा चिकित्सक बनेर बिरामीलाई चेकजाँच गरेको बहाना बनाउनका साथै डाक्टरहरुलाई समेत बिवाह गर्ने भनिसँगै बसी ठगी गर्दै आएको खुलेको ।
४. २०७२ वैशाख १३–१४ काठमाडौं प्रवेश गरी विभिन्न डाक्टर, युवा तथा होटलमा ठग्दै आएको ।
५. मिति २०७१।०६।२६ गते डाक्टर हुँ भनि वैवाहिक सम्बन्ध राख्ने प्रयास गरेकोमा बिवाद हुँदा प्रभाग सातदोबाटोमा १ रात थुनामा रहेको ।
प्रतिक्रिया