जनकपुरधाम, १६ पुस । मधेसमा जारी रहेको आन्दोलनको कारणले गर्दा अहिले लालगढ कुष्ठ अस्पतालको सेवा नै प्रभावित भएको छ ।
यातायात नचलेका कारणले बिरामी अस्पतालसम्म आउन सकेका छैनन् । बन्द हडतालका कारण अस्पतालमा इन्धनलगायतका सामानको अभाव सिर्जना भएपछि अस्पतालमा आउने गरेका बिरामीलाई समस्या भइरहेको छ भने बाहिरबाट बिरामी आउनसमेत निकै सकस हुने गरेको छ । मधेसमा जारी रहेको अधिकार प्राप्तिको आन्दोलन झन्डै पाँच महिना बितिसक्दा पनि राजनीतिक मुद्दा सम्बोधन हुननसकेकाले तराईवासीको जनजीवन निकै कष्टपूर्ण भएको छ ।
तराई बन्द रहेका कारण यातायात नचल्नाले धनुषा राजमार्गमा रहेको लालगढ कुष्ठ अस्पतालमा आउने बिरामीको सङ्ख्यामा कमी आएको छ भने आएका बिरामीलाई पनि अस्पतालमा आवश्यक सामान अभावकाकारण सेवा सञ्चालनमा समेत समस्या आउने गरेको छ ।
अक्सिजन र औषधिको आपूर्ति ठप्प हुँदा उपचाररत कुष्ठरोगीको उपचारमा समस्या परेको हो । अस्पतालका कार्यकारी निर्देशक डम्बरबहादुर आलेका अनुसार मुख्यतः अक्सिजन र औषधि सकिएकाले समस्या भएको हो जसका कारण कुष्ठरोग लागेर क्षति भएका अङ्गको शल्यक्रिया ‘रिकन्सट्रक्सन सर्जरी’ हुनसकेको छैन ।
‘सर्जरी हुन नसक्दा बिरामीमा अपाङ्गताको जोखिम बढेको छ’ आलेले चिन्ता व्यक्त गर्नुभयो । ‘अङ्गभङ्ग र अन्धोपन हुनसक्ने खतरा पनि उत्तिकै छ,’ उहाँले भन्नुभयो ।
अस्पतालले जाडो मौसम लागेपछि निःशुल्क सर्जरी सेवा प्रदान गर्दैआएको छ । यस्ता सर्जरी गर्नुपर्ने पाँचदर्जन रोगी प्रतिक्षामा रहेको अस्पतालले जनाएको छ ।
अस्पतालमा उपचारका लागि आउने गरिएका बिरामीलाई कुष्ठ भइरहेको छ भने इन्धन अभावका कारणले गर्दा अस्पतालका सवारीसाधन समेत चल्न सकेका छैनन् । आलेले कुष्ठरोग प्रभावित व्यक्ति अस्पताल आउन नसक्दा पछि गएर निकै घाउ हुने र समस्या हुने अवस्था देखिएको बताउनुभयो ।
उहा“ले कतिपय बिरामीलाई औषधिले निको हुने गरेका कारणले तुरुन्त अस्पताल आएनन् भने केही दिनमा घाउ निको हुने र त्यो पूर्णरूपमा निको नहुने समस्या आउने गरेका कारणले यस्ता बिरामीलाई समस्या आउने गरेको आलेले बताउनुभयो ।
इन्धन अभावका कारणले बिरामीलाई शल्यक्रिया गराउनमा समेत समस्या आउने गरेकाले अहिले अस्पतालको सेवा नै अस्तव्यस्त बनेको छ । कुष्ठरोग विषयमा गाउँगाउँमा गएर जनचेतना जगाउने कामसमेत प्रभावित भएको अस्पतालले जनाएको छ ।
छालामा समस्या देखिएपछि लालगढ अस्पतालमा उपचार गराउन आएकी सिरहाकी रामकुमारी कापरले आफनो सकसपूर्ण यातना सुनाउँदै भनिन्–यातायात चलेको छैन । मोटरसाइकलमा आउँदा कुनबेला आन्दोलनकारीले कहाँ तोडफोड गर्ने हो भन्ने समस्याले आफूलाई निकै चिन्तित बनाएको बताइन् । उनले चारसय रुपैयाको तेल हालेर आएको र उपचार गराएर फर्कि“दा जान समस्या भएको बताइन् ।
अस्पतालमा तीनसयको हाराहारीमा आउने गरेका बिरामीको सङ्ख्यामा अहिले निकै कमी आएको छ । अस्पतालमा उपचार गराइरहेका बिरामीलाई घर कसरी जाने भन्ने समस्याले पिरोलेको हुन्छ । मधेसमा जारी रहेको आन्दोलनका कारण अस्पतालमा उपचार गराएका बिरामीलाई निकै समस्या भइरहेको छ । अस्पतालले अहिलेसम्म करिब ३४ हजार कुष्ठ रोगीको उपचार गरिसकेको छ ।
मधेसमा जारी रहेको आन्दोलनको झन्डै पाँच महिना हुनलाग्दा समेत समस्याको निकास ननिस्किएकाले तराईको जनजीवन कष्टकर बनेको छ भने अत्यावश्यक सेवाको रूपमा रहेको अस्पतालसमेत प्रभावित भएको छ । यस विषयमा समयमै सरोकारवाला निकायको ध्यान जानुपर्ने आवश्यकता रहेको छ । रासस
प्रतिक्रिया