भक्तपुर, २५ कात्तिक । उपप्रधानमन्त्री सिपी मैनालीले २०४५ सालमा भारतले गरेको नाकाबन्दीपछि पनि इन्धनमा भारतसँगै निर्भर हुनु नेपालको भूल भएको बताउनुभएको छ ।

नेकपा (माले) भक्तपुरले आज आयोजना गरेको शुभकामना आदानप्रदान तथा बधाई ज्ञापन कार्यक्रममा उपप्रधानमन्त्री मैनालीले त्यतिबेला भारतले गरेको नाकाबन्दीबाट पाठ सिकेर आत्मनिर्भर हुन सकेको भए अहिलेको जस्तो हाहाकारको अवस्था आउँदैनथ्यो भन्नुभयो ।

उहाँले नेपाल इन्धनका लागि भारतसँग झुक्न नहुने बताउँदै यसको विकल्प खोजेर आत्मनिर्भर बन्नेतर्फ लाग्नुपर्ने औँल्याउनुभयो । सरकार भारतसँग इन्धन आयातका लागि कूटनीतिक पहल गर्न र चीनतर्फका सबै नाका खोल्न लागि परेको उहाँको भनाइ थियो ।

उहाँले मधेसका जायज माग पूरा गर्न सरकार काँग्रेस समेतको संलग्नतामा सर्वपक्षीय नयाँ समिति गठन गरी समाधान खोज्न तत्पर रहेको बताउनुभयो । मधेसकेन्द्रित दलको तराई आन्दोलनलाई सम्बोधन गर्न उनीहरुका मागभन्दा मुख्य विषयमा केन्द्रिकृत भई घनीभूत छलफल गरी समाधान खोजिने उहाँको धारणा थियो ।

मालेका महासचिव मैनालीले मधेस आन्दोलन घरभित्रको समस्या भएको जनाउँदै यसको समाधानमा बाह्य शक्तिको सहयोगको कुनै आवश्यकता नरहेको स्पष्ट गर्नुभयो । “मुलुकलाई केन्द्रबिन्दुमा राखेर समाधान खोज्दा सबै समस्याको समाधान निस्कन्छ”– उहाँले भन्नुभयो ।

कार्यक्रममा माले भक्तपुरका सचिव अदीप खड्का, पार्टी पोलिटब्युरो सदस्यद्वय कुमार बेल्वासे र वीरेन्द्र थपलिया तथा केन्द्रीय सदस्य रोहित केसीलगायतले भारतको नाकाबन्दीविरुद्ध नागरिकले दबाब सिर्जना गर्नुपर्नेमा जोड दिनुभयो । रासस