काठमाडौँ, २३ कार्तिक । मन्त्रिपरिषद्ले विशेष प्रस्ताव पास गर्दै अवरुद्ध सीमा नाका खोली औषधि, ग्यास, पेट्रोल तथा अन्य अत्यावश्यक वस्तुको आयात–निर्यात सहज बनाउन भारतसँग आग्रह गरेको छ । दुई देशबीचको सम्बन्ध सुमधुर बनाउन पनि मन्त्रिपरिषद्ले भारतलाई आग्रह गरेको छ ।

मन्त्रिपरिषद्ले गरेको निर्णयमा भनिएको छ,‘नेपाल भारतका सीमा नाकाहरुमा भइरहेको पारवहन तथा आपूर्ति व्यवस्थामा देखिएको अवरोधको स्थिति समाप्त गरी औषधी, खाना पकाउने ग्यास र पेट्रोलियम पदार्थहरुलगायत अत्यावश्यक वस्तुहरुको आयातनिर्यात नियमित गर्न एवं दुई देशबीचको सम्बन्धलाई सुमधुर तथा सुदृढ तुल्याउने कार्यमा योगदान गर्न मन्त्रिपरिषद्को यो बैठक छिमेकी मित्रराष्ट्र भारतसँग आग्रह गर्दछ,’ ।

मन्त्रिपरिषद्ले तराई मधेशमा आन्दोलनरत दलहरुलाई वार्ता मार्फत् समस्याको समाधान खोज्न पनि आग्रह गरेको प्रधानमन्त्रीका प्रेस सल्लाहकार प्रमोद दाहालले बताए ।

आन्दोलनका घाइतेको उपचारको व्यवस्था भएको, झुटा मुद्दाहरु फिर्ता लिने प्रक्रिया आरम्भ भएको र मृतकका परिवारलाई १० लाख रुपैयाँ उपलब्ध गराउने कार्यान्वयन भइसकेको भन्दै मन्त्रिपरिषद्ले तिहार, छठ र ल्होसारको मुखमा बन्द र सीमा भन्सारमा धर्ना कार्य बन्द गर्न आग्रह गरेको छ ।

‘वर्तमान सरकार तराई र देशभरि नै जनतामा परिरहेको मर्का र असुविधाप्रति अत्यन्तै दुखित र चिन्तित छ । यस्तो संकटको घडिमा आमजनताबाट देखाइएको धैर्य, सदभाव र सदाशयताको निमित्त सरकार सबैमा हार्दिक आभार प्रकट गर्दछ,’ मन्त्रिपरिषद्ले भनेको छ । वार्ता र संवादबाट नै समस्याको समाधान हुनेमा पनि सरकारले विश्वास व्यक्त गरेको छ ।