हिमालय खबर, काठमाडौं । गैरआवासीय नेपाली संघ (एनआरएनए)को अध्यक्षमा पुनः शेष घले निर्वाचित भएका छन् ।
बिहीबार भएको निर्वाचनमा टेकबहादुर (टीबी) कार्कीलाई पराजित गर्दै घले दोस्रो कार्यकालका लागि निर्वाचित भएका हुन् । घलेले ८६७ मत पाएका छन् भने उनका निकटतम प्रतिद्वन्द्वी कार्कीले २२६ मत पाए ।
गैरआवासीय नेपाली संघ (एनआरएन)को सातौं विश्व सम्मेलन सम्पन्न भएको छ । सम्मेलनले शेष घलेलाई अध्यक्षमा विजयी बनाएको छ । नेतृत्व चयनका लागि विहीबार काठमाण्डौँको सोल्टी होटलमा सम्पन्न निर्वाचनमा शेष घले पुनः दोस्रो कार्यकालका लागि अध्यक्षमा निर्वाचित भएका हुन् ।
अध्यक्षका प्रत्यासीका लागि यसअघि टिबी कार्की र रतन झाले उम्मेरवारी पेश गरेका थिए । तर अन्तिम समयमा आएर रतन झाले भने आफ्नो उम्मेदवारी फिर्ता लिएका थिए । झाले अध्यक्षका उम्मेदवार शेष घलेलाई समर्थन गर्दै उम्मेदवारी फिर्ता लिएका हुन् । त्यसपछि टिबी कार्की र घलेबीच भएको भोटिङमा घले बिजयी भएका हुन् ।
नेपालमै बनेको बिद्युतीय मेसिनमार्फत गरिएको मतदानको परिणाम भर्खरै मात्र सार्वजनिक भएको छ ।
सन् २०१३ मा भएको गैर आवासीय नेपाली संघको निर्वाचनमा ५ सय १० मत प्राप्त गरेर विजयी भएका थिए । उनको कार्यकाल निकै सफल मानिन्छ । घले अष्ट्रेलिया निवासी हु्न् ।
उपाध्यक्षमा भवन भट्ट र कुमार पन्त निर्वाचित भएका छन् । भट्टले ५३८ र पन्तले ५१३ मत प्राप्त गरेका छन् । यस्तै खगेन्द्र जिसीले ३१७, नरेन्द्र भाटले २६९, लक्ष्यबहादुर थापाले १६५ र रामसिंह थापाले १२७ मत प्राप्त गरेको हाम्रा विशेष संवाददाताले जनाएका छन् ।
महासचिवमा वद्री केसी निर्वाचित भए । उनले ५५२ पाएका छन् । यस्तै पुष्पराज तिमिल्सेनाले १२२, पुष्प थापाले १३४ र रञ्जु थापाले २५५ मत प्राप्त गरेका थिए ।
कोषाध्यक्षमा हिक्मतबहादुर थापा २६४ मत प्राप्त गरी विजयी बनेका छन् । यमकुमार गुरुङले २४६, राजेन्द्र सिवाकोटीले २१३, चिरञ्जीवी थापाले २०३ र भैरवप्रसाद ढकालले १६४ मत प्राप्त गरे ।
सचिवमा अर्जुनकुमार श्रेष्ठ ३९१ मतका साथ निर्वाचित भएका छन् । यस्तै गणश केसीले ३१६, सुरेन्द्रबहादुर श्रेष्ठले १८२ र धर्मबहादुर केसीले १६९ मत ल्याएका छन् ।
युवा संयोजकमा विजय पोखरेल र उपसंयोजकमा लोकराज शर्मा तथा महिला संयोजकमा सपिला राजभण्डारी र उपसंयोजकमा राजनी प्रधान निर्वाचित भएका छन् ।
अमेरिका संयोजकमा सेनाम लामा, उपसंयोजकमा आङ छिरिग शेर्पा, एसिया प्यासिफक संयोजकमा किरण विक्रम थापा र युरोप सह संयोजकमा दाबा शेर्पा र प्रेम गुरुङ निर्वाचित भएका छन् । युरोप संयोजकमा कुल आचार्य निर्विरोध निर्वाचित भइसकेका छन् ।
यस्तै गल्फ संयोजकमा डीबी क्षेत्री, उपसंयोजकमा धर्मराज गिरी र उमेश अधिकारी ओसियानामा महेन्द्र लम्साल निर्वाचित भएका छन् ।
सदस्यतर्फको नतिजा आउँदैछ । प्रतीक्षा गर्नुहोला ।
प्रतिक्रिया