न्युयोर्क, सेप्टेम्बर २५ ।नेपालमा जारी संविधानले आदिवासी, जनजाति तथा तराई–मधेसको भावनाको सम्वोधन नगरेको भन्दै रुष्ट रहेका अमेरिकास्थित आदिवासी जनजाति महासंघलगायतका संघसंस्थाहरु त्यसको विरोध गर्दै आएका छन् ।
यही क्रममा तराई–मधेसमा सरकारी दमन भएको र त्यो मानवताविराधी अपराध भएको ठहर गर्दै उनीहरुले शुक्रबार अपरान्ह संयुक्त राष्ट्र संघ भवनअगाडि प्रदर्शन गरे ।
राष्ट्र संघलाई नेपालमा भैरहेको सरकारी दमन रोक्नका लागि आवश्यक पहल गर्न ध्यानाकर्षण गर्नका लागि विरोध प्रदर्शन गरेको उनीहरुको भनाइ छ ।
आयोजकहरुले राष्ट्र संघको ७० औं महासभामा भाग लिन आएका नेपाल सरकारका मन्त्रीहरुलाई आफ्नो विरोध छ भन्ने देखाउनका लागि समेत विरोध प्रदर्शन गरेको बताए ।
नेपाल आदिवासी जनजाति महासंघको अगुवाइमा विभिन्न ६ संस्थाको सहभागिता रहेकोे विरोध प्रदर्शनको नेतृत्व महासंघका अध्यक्ष लुइसाङ वाइवाले गरेका थिए ।
महासंघको प्रदर्शनलाई लिएर तीनखाले विचारहरु अमेरिकामा छन् । एकथरि समर्थन गर्छन् भने अर्को थरि विरोध । तर, मध्यमार्गी धारमा रहेका तेस्रो थरि विचार राख्नेहरु भने तराई–मधेसमा दुबै पक्षबाट ज्यादती भएको धारणा राख्छन् । उनीहरुको भनाइ छ, त्यहाँ सरकारी दमन मात्र भएको छैन, आन्दोलनका नाममा सुरक्षाकर्मीहरुलाई जिउँदै जलाउने काम पनि भएको छ ।
राष्ट्र संघको न्यूयोर्कस्थित मूख्यालय बाहिर भारतीय प्रधानमन्त्री नरेन्द्र मोदीविरुद्ध उनकै देशका नागरिकले समेत प्रदर्शन गरेका छन् । राष्ट्र संघ मूख्यालयबाहिर मोदीविरुद्ध सिख र पटेल समुदायले नाराबाजी गर्दै प्रदर्शन गरेका हुन् संयुक्त राष्ट्र शिखर सम्मेलनमा एक विशेष सत्रमा विकासबारेमा प्रधानमन्त्री मोदीले सम्बोधन गरिरहँदा उनीविरुद्ध सिख र पाटीदार समुदायको एक समुहले नाराबाजी गर्दै प्रदर्शन गरेका हुन् ।
सिख्स फर जस्टिस (एसएफजे) को ब्यानरमा २ सय जना बढी सिखले पञ्जाबमा मानवाधिकार उल्लंघनको आरोप लगाउँदै विरोध गरेका हुन् ।
प्रतिक्रिया