चितवन । चितवन प्रशासनले आन्दोलनमा होमिएका सबैलाई संयमित भई आन्दोलन गर्न अनुरोध गरेको छ । 

 

प्रशासन कार्यालयमा मंगलबार बसेको सर्वदलीय, सर्वपक्षीय बैठकमा बोल्दै प्रमुख जिल्ला अधिकारी विनोदप्रकाश सिंहले शान्तिपूर्ण रुपमा माग राख्न पाउने अधिकार भए पनि हिंसात्मक रुप नदिन सबैमा अनुरोध गर्नुभयो । ‘आफ्नो जायज माग राखौं, संयमित भई अघि बढौं’–प्रजिअ सिंहले भन्नुभयो ।

 

बैठकमा बोल्दै राजनीतिक दलका प्रमुखहरुले आन्दोलनमा उत्रिएका थरुहट अगुवाहरुलाई संयमित भएर आफ्नो माग राख्न आग्रह गरे । उनीहरुले अहिले पनि आन्दोलनमा दलहरुले साथ दिएको भन्दै शान्तिपुर्ण रुपमा आफ्नो मागलाई राख्न अनुरोध गरेका छन् ।

 

नेपाली काँग्रेसका सभापति टेकप्रसाद गुरुङले जनजाति र थरुहट आन्दोलनको मागप्रति राजनीतिक दलहरुको समर्थन रहेको भनदै जायज माग पूरा गराउन सबैले प्रयत्न गर्ने बताउनुभयो । नेकपा एमालेका जिल्ला अध्यक्ष जेएन थपलियाले थारु अगुवाहरुसँग छलफल गरी जायज मागलाई संवोधन गराउन केन्द्रसँग अनुरोध गर्न सकिने बताउनुभयो । 

 

उहाँले चितवनमा अहिलेजस्तो जातीय सद्भाव कायम राख्न आन्दोलनका अगुवाहरुसँग आग्रह गर्नुभयो । राप्रपा नेपालका जिल्ला अध्यक्ष बद्री तिमिल्सेनाले चितवनमा अहिलेसम्मको सद्भाव कायम गरी शान्तिपूर्ण रुपमा आफ्नो माग राख्नुपर्ने बताउनुभयो ।