हिमालय खबर, चितवन । चितवनकी समाजसेवी मैयादेवी श्रेष्ठले नौ करोड रुपैयाँबराबरको सम्पत्ति बुधबार आफ्नै नाममा रहेको ट्रष्टलाई हस्तान्तरण गरेकी छिन् । कार्यक्रममा उनले ट्रष्टका अध्यक्ष प्रेमकुमार श्रेष्ठलाई सो सहयोग हस्तान्तरण गरेकी हुन् । सुश्री मैयादेवी श्रेष्ठ ट्रष्टका नाममा उनले दुई करोड रुपैयाँ नगदको अक्षयकोष र ७ करोड रुपैयाँबराबरको घर हस्तान्तरण गरेकी हुन् । 

 

सोही अवसरमा उनले नेपाल प्रेस युनियन चितवनको भवन निर्माणका लागि जग्गा उपलब्ध गराउने घोषणा पनि गरिन् । सिङ्गो जीवन राजनीतिसँगै दान धर्म र समाजसेवामा बिताएकी उनले बाँकी सम्पत्ति पनि समाजसेवामा लगाउने उद्देश्यले हस्तान्तरण गरिएको बताइन्छ । 

 

सो अवसरमा बोल्दै उनले सेवाका लागि आफ्नो सम्पत्ति हस्तान्तरण गरेको बताइन् । ‘यो धन मेरो होइन् । सम्पत्ति पनि मेरो छैन । यो सबै सम्पत्ति जनतारुपी जनार्दनको हो । उनीहरुकै सेवाका लागि मैले हस्तान्तरण गरेको हुँ’, उनले भनिन् । 

 

ट्रष्टले घर बहालको रकम र व्याजबाट सामाजिक क्षेत्रमा काम गर्ने जनाएको छ । विसं १९८५ असोज ५ गते जन्मिएकी श्रेष्ठले २००३ सालमा नेपाली राष्ट्रिय कांग्रेसमा प्रवेश गरी राजनीति र सामाजिक कामको थालनी गरेकी थिइन् । उनले आफ्नो नाममा रहेका बाँकी जग्गा, धनसम्पति एवम् गरगहनासमेत सामाजिक क्षेत्रमा दान गर्ने घोषणा पनि गरिन् । 

 

विसं १९८५ मा जन्मिएकी मैयादेवी अविवाहित हुन् । उनले  पाएको पैतृक सम्पत्तिबाटै अहिलेसम्म दान धर्म र सेवा गर्दै आएकी हुन् । दानवीरका नामले चिनिएकी उनिले साना ठूला थुप्रै दान र सहयोग गरेकी छन् । अहिले ८७ वर्ष उमेर पार गर्दै गर्दा उनले आफ्नो बाँकी सम्पत्ति ट्रष्टका नाममा दिएकी छन् ।

 

ट्रष्टले शिक्षा, स्वास्थ्य, सरसफाइ र धार्मिक क्षेत्रको विकासका लागि विभिन्न कार्यक्रमहरु सञ्चालन गर्ने गरी स्थापना गरिएको हो । शिक्षा र स्वास्थ्यमा उल्लेखनीय दान गरेकी श्रेष्ठले विभिन्न मठमन्दिर निर्माणदेखि सडक निर्माणमा समेत सहयोग पुग्दै आएको छ । 

 

हाल झण्डै तीन करोड रुपैयाँ पर्ने नेपाली कांग्रेसको काठमाडौँमा रहेको केन्द्रीय कार्यालय भवन र तीन करोड रुपैयाँकै हाराहारीमा पर्ने चितवन कांग्रेसले निर्माण गरेको भवनको जग्गा पनि श्रेष्ठले नै पार्टीलाई प्रदान गरेकी हुन् । उनले झण्डै ७ करोड रुपैयाँबराबरको लगानीमा भरतपुरमा रहेको कन्या कलेजको भवन निर्माण गरेर कलेज मैयादेवीका नाममा कायम भएको छ । 

 

सहयोग माग्न आउनेलाई रित्तो हात नफर्काउने समाजसेवी मैयादेवी श्रेष्ठले हालसम्म यसका अतिरिक्त विभिन्न संघसंस्था र व्यक्तिलाई गरी ६२ करोड रुपैयाँभन्दा बढीको भूमिदान एवं सहयोग गरिसकेको श्रेष्ठका धर्मपुत्र टंकप्रसाद पौडेलले जानकारी दिए । 

 

नेपाली कांग्रेस केन्द्रीय समितिको कार्यालय भवन, कांग्रेस चितवनको भवन निर्माणका लागि नारायणगढमा जग्गा उपलब्ध गराएकी थिइन् । सो घर जग्गाको मूल्य अहिले  तीन÷तीन करोड रुपैयाँभन्दा बढी पर्छ । उनले झण्डै ७ करोड रुपैयाँबराबरको लगानीमा भरतपुरमा रहेको कन्या कलेजको भवन निर्माण गरेर कलेज नै मैयादेवीका नाममा कायम गराएकी छन् । कलेजमा अहिले पनि झण्डै एक हजार छात्रा अध्ययनरत छन् । 

 

त्यसैगरी नेपाली कांग्रेसका नेता तथा कार्यकर्तालाई समेत गरी ६ करोड ५० लाखबराबरको जग्गादान गरिसकेकी छन् । श्रेष्ठले आफ्नो आश्रयमा रहेका र आफूले पालेका विभिन्न परिवारलाई ३३ करोड ५७ लाखको भूमिदान गरिसकेकी छन् । उनले सामाजिक एवम् धार्मिक संघसंस्था, पाटी पौवा, धर्मशालाहरुमा करिव १२ करोड रुपैयाँ सहयोग गरेको उनका परिवारले जनाएका छन् । स्वदेशमा मात्रै होइन, विदेशमा पनि उनले सहयोग गरेकी छन् ।