चितवन । चितवनको रामपुरस्थित त्रिभुवन विश्वविद्यालयअन्तर्गतको कृषि तथा पशु विज्ञान केन्द्रीय अध्ययन संस्थानमा कार्यरत प्राध्यापक तथा कर्मचारीहरुले ६ महिनादेखि तलब पाएका छैनन् ।
क्याम्पस प्रशासन र डिन प्रशासनबीच तालमेल नमिल्दा १५ जना प्राध्यापक तथा ४० जना कर्मचारी पीडित बनेका हुन् । नेपालकै दक्ष जनशक्ति उत्पादन गर्ने भनिएको सरकारी मातहतको कृषि तथा पशु विज्ञान अध्ययन संस्थानमा प्रशासन जिम्मेवारविहीन हुँदा त्यहाँ काम गर्ने प्राध्यापक कर्मचारी निरास भएका छन् ।
संस्थानमा कृषि र भेटेरिनरी गरी २५० जना विद्यार्थी अध्ययनरत छन् । एउटा विद्यार्थी उत्पादन गर्न झण्डै ४० लाख खर्च हुने बताइन्छ । तर प्रशासन जिम्मेवार नहुँदा पढाइको गुणस्तरसमेत खस्किएको एक प्राध्यापकले बताए ।
प्रतिष्ठानका सह–प्राध्यापक डा। कृष्ण काफ्ले विश्वविद्यालयमा प्रयोगात्मक र सैद्धान्तिक ज्ञानको कमी हुँदै गएको स्वीकार गर्छन् । उनी भन्छन्, ‘हतारमा पढाइ हुने गरेको छ । विद्यार्थीलाई जुनियर कर्मचारीको भरमा अध्ययन भ्रमण गराइँदै आएको छ । यस्तो प्रवृत्तिले विश्वविद्यालयको भविष्य नै अन्योलमा परेको छ ।’
दुर्भाग्य त के भने भेटेरिनरी विभागमा विभागीय प्रमुख नै नभएको लामो समय भइसकेको छ । स्तरीय प्राध्यापकको पदोन्नतिसमेत हुन सकेको छैन । तलब खान नपाएरै धेरै प्राध्यापकहरु दुई वर्षअघि अर्को कृषि तथा वन विज्ञान विश्वविद्यालयमा फड्किएका थिए । योे समस्या अझै पनि सुल्झिएको छैन ।
क्याम्पस प्रशासनकै लापर्बाहीका कारण प्राध्यापकहरु पलायन हुने संभावना बढेको डा काफ्ले बताउँछन् । डिन प्रो। नरेन्द्रकुमार चौधरी र क्याम्पस प्रमुख श्यामसुन्दर पन्तको टकराबको शिकार प्राध्यापक÷कर्मचारी बन्नु परेको छ । क्याम्पसको व्यवस्थापकीय कमजोरीका कारण अध्ययन बिदामा विदेसिएका अधिकांश प्राध्यापक पलायन भएका छन् ।
स्वदेशमै रहेर श्रम खर्चेका डा काफ्लेजस्ता प्राध्यापकको सही मूल्यांकन हुन सकेको छैन । डा काफ्लेले विगत चार महिनादेखि तलब पाउन नसकेको गुनासो गरे । अन्य विकल्प नहुने र पढाएरै जीवनयापन गर्नुपर्ने प्राध्यापक/कर्मचारी बढी समस्यामा परेका छन् । एउटा क्याम्पसमा असन्तुष्ट भएर तलब नपाएकै कारण अर्को विश्वविद्यालयमा जाने दृष्टान्तले कृषि तथा पशुविज्ञान अध्ययन संस्थानभित्र कतिसम्म गैरजिम्मेवारपन हावी भएको छ भन्ने प्रष्ट भएको छ ।
प्रतिक्रिया