कोलम्बो । श्रीलङ्काका पूर्व राष्ट्रपति महिन्दा राजपाक्छेले आफू पुनः सत्तामा आउने बताएका छन् । उनले सोमबारबाट सुरू भएको आमनिर्वाचन शान्तिपूर्ण रुपमा सम्पन्न भएमा आफूले जित्ने र पुनः सत्तामा आउने धारणा सोमबारै राखेका हुन् । आफूले सत्ता छोडेको केही महिनापछि सम्पन्न हुन लागेको यस निर्वाचनमार्फत् आफू पुनः सत्तामा आउन लागेको कुरा उनले बताएको समाचारमा जनाइएको छ ।

 

श्रीलङ्कामा आगामी कार्यकालका लागि संसदीय निर्वाचनको मतदान सोमबार हुन लागेको हो । श्रीलङ्काली संसदको २२५ जना सांसदका लागि आज सो निर्वाचन हुन लागेको हो । यस निर्वाचन श्रीलङ्काको कानुन बमोजिम वर्षदिन पहिला नै राष्ट्रपति मैत्रीपाला सिरिसेनाले यसैवर्षका लागि आह्वान गरेका हुन् ।

 

सोमबार बिहानबाट सुरु भएको यस निर्वाचनको मतदान अपरान्ह ४ बजेसम्म जारी रहने छ । सम्भवत मङ्गलबार नै यसको परिणाम सार्वजनिक हुने बताइएको छ । यस निर्वाचनमा पूर्व राष्ट्रपति राजपाक्छेले आफूलाई प्रधानमन्त्रीको उम्मेदवारका रुपमा अघि सार्नुभएको छ । राजपाक्छे पनि युनाइटेड पिपुल्स फ्रिड्म अलाइन्सका तर्फबाट उम्मेदवार बन्नुभएको छ । 

 

तर राष्ट्रपति सिरिसेनाले भने कुनैपनि हालतमा राजपाक्छे प्रधानमन्त्री बन्न नसक्ने बताउँदै आएका छन् । उनले यदि राजपाक्छे शक्तिमा आउने हो भने आफूले प्रधानमन्त्रीको शक्ति कटौती पनि गरिदिने सम्मको धम्की पनि दिएका छन् । केही महिनाअघि भएको राष्ट्रपतीय निर्वाचनबाट राजपाक्छे पराजित हुनुभएको थियो । उहाँकै मन्त्रिमण्डलका एकजना सदस्य रहनुभएका सिरिसेना राष्ट्रपति बनेका हुन् । रासस / एएफपी