काठमाडौँ । प्रमुख चार दलका शीर्ष नेताहरूले संविधानसभामा विचाराधीन ६ प्रदेशको सीमांकनमा जनताको सुझावअनुसार परिमार्जन गर्ने प्रतिबद्धता जनाउँदै त्यसको विरोधमा आन्दोलन गरिरहेका सर्वसाधारणलाई संयमित हुन अपिल गरेका छन् । कान्तिपुरमा समाचार छ ।

 

प्रधानमन्त्री तथा कांग्रेस सभापति सुशील कोइराला, एमाले अध्यक्ष केपी ओली, एमाओवादी अध्यक्ष पुष्पकमल दाहाल र फोरम लोकतान्त्रिकका अध्यक्ष विजयकुमार गच्छदारले मंगलबार संविधानसभा भवन नयाँ बानेश्वरमा विशेष पत्रकार सम्मेलन गरी सीमांकनको असन्तुष्टि भिडाएर संविधानसभाबाट संविधानै बन्न नदिन सक्रिय तत्त्वप्रति सजग रहन जनतासँग अपिल गरेका हुन् ।

 

‘नेपालको सन्दर्भमा संघीयता नयाँ विषय हुनाले यसमा जे जसरी सीमांकन गर्दा पनि कहीं न कहीं विवाद रहनु र जनताले विविध कोणबाट कुरा उठाउनु, सुझाव दिनु स्वाभाविक पनि हो । 

 

यी उठेका विवादलाई जनताको भावना र राष्ट्रको आवश्यकता र हितलाई ध्यानमा राखी उचित समाधान पहिल्याउने प्रयत्न गरिनेछ,’ चार शीर्ष नेताको संयुक्त अपिलमा भनिएको छ, ‘यस घडीमा सम्पूर्ण जनतालाई संयम धारण गर्न र सबै प्रकारका आन्दोलन रोकी उपयुक्त सुझावद्वारा सहयोग पुर्‍याई समस्या समाधानको प्रतीक्षा गर्न हामी हार्दिक अपिल गर्दछौं ।’