पोखरा । भारी वर्षाका कारण कास्कीको लुम्लेमा खसेकोपहिरोमा परेर मृत्यु भएका १८ जनाको सामूहिक अन्त्येष्टि गरिएको छ । पहिरोमा ज्यान गुमाएका ३१ को शव फेला परेको छ भने आठ अझै बेपत्ता छन् । 

 

उनीहरुको नयाँ पुलनजिकैको घाटमा अन्तिम संस्कार गरिएको हो । लुम्लेमा अहिलेसम्म २४ जनाको शव फेला परेको छ भने चारजना अझै वेपत्ता छन् । मृतकहरुका आफन्तहरुलाई थप दुःख नहोस् भनेर प्रहरीले घटनास्थलमै चिकित्सक लगेर पोष्टमार्टमको व्यवस्था गरेको थियो ।

 

शुक्रबार दिउँसोसम्म ३१ जनाको शव फेला परेको छ । भदौरे तामागीमा ५ र ढिकुरपोखरीमा २ जनाको शव फेला परेको हो । लुम्लेमा बिहानैदेखि खोजिमा जुटेको सुरक्षाकर्मीको टोलीले माझघरकी ७२ बर्षिया सियोधरी देवकोटाको शव भेटेको थियो ।

 

भदौरेतामागी–५ को घाँटीछिना डुडाको खेतमा चार र लुम्लेमा चार गरी आठजना अझै वेपत्ता रहेका प्रहरीले जनाएको छ । उनीहरुको नेपाली सेना, शशस्त्र प्रहरी बल र नेपाल प्रहरीसहित स्थानीयबासीको टोलीले बिहानैदेखि खोजी जारी राखेको छ ।

 

बेपत्ता हुनेहरुमा भदौरे तामागीमा–१० महिनाका किस्मत सुनार, ५ वर्षीय विश्व पराजुली, ७ वर्षीय समिर पराजुली र १० वर्षीय मनबहादुर सुनार रहेका छन् । यसैगरी लुम्लेमा ६८ वर्षीय ईन्द्रप्रसाद देवकोटा, ६२ वर्षीया रुद्रववति देवकोटा, ५ वर्षीया कविता शेर्पा र ५ महिनाकी अञ्जली शेर्पा रहेका जिल्ला प्रहरी कार्यालय कास्कीका प्रहरी नायव उपरीक्षक केदार रजौरेले जानकारी दिए ।