स्मार्टफोन एडिक्टसन अर्थात् स्मार्टफोनको लत, यसका कतिपय नकारात्मक प्रभाव छन् । वैज्ञानिकहरुले स्मार्टफोनको यस्तो लतबाट छुटकारा दिलाउनका लागि एउटा अनौठो उपायको खोजी गरेका छन् ।
अब एउटा औँठीले तपाइँलाई स्मार्टफोनको लतबाट छुटकारा दिलाउनेछ । रिंगली नामक अमेरिकी कम्पनील एउटा यस्तो औँठीको उत्पादन गरेको छ जसले स्मार्टफोनमा झुण्डिरहने लत बसेका मानिसहरुलाई स्मार्टफोनबाट टाढा राख्नेछ ।
१ सय ९५ डलर मूल्य रहेको उक्त औँठी वास्तवमा स्मार्ट औँठी हो । उक्त औँठी स्मार्टफोन फिल्टरको माध्यमबाट प्रयोगकर्ताको स्मार्टफोनसँग कनेक्टेड भएको हुन्छ ।
प्रयोगकर्ताले आफ्नो साथमा मोबाइल नबोकेपनि हुन्छ, केवल औँठी लगाएमा पर्याप्त हुन्छ । औँठीले नै मेाबाइलमा कुनै अत्यावश्यक सन्देश आएमा त्यसको अलर्ट प्रवाह गर्छ र औँठी चम्किन थाल्छ । तर फेसबुक, इमेल तथा च्याटिङका कम महत्वका अलर्टहरु प्रवाह गर्दैन । जसका कारण प्रयोगकर्ताले बारम्बार स्मार्टफोनमा आँखा डुलाइरहनुपर्ने बाध्यता हट्दछ ।
अमेरिकामा हालै भएको एक अध्ययन अनुसार एक तिहाइ मानिसहरु बारम्बार आफ्नो स्मार्टफोन चेक गरिरहन्छन् भने दुइ तिहाइ भन्दा धेरै मानिसहरु आफ्नो साथमा स्मार्टफोन राखेर सुत्दछन् । मानिसहरुको यहीँ आनीबानीलाई आधार बनाएर ग्याजेट कम्पनीहरु मानिसहरुलाई स्मार्टफोनबाट टाढा राख्नका लागि व्यवसायको मौकाको खोजी गरिरहेका छन् ।
एप्पलका स्मार्टवाच जस्ता ग्याजेटको उद्धेश्य पनि मानिसहरुलाई कम भन्दा कम समय स्मार्टफोनको प्रयोग गर्ने बनाउनु हो । पछिल्लो महिना मात्र गुगल तथा लिभाइजले पनि हाइटेक कपडा निर्माण गर्ने योजनाको घोषण ागरेका थिए । ज्याकेटको चेन लगाउँदा स्मार्टफोन लक हुने प्रविधिले युक्त स्मार्ट कपडा बनाउने घोषणा समेत गरिएको छ । – एजेन्सी
प्रतिक्रिया