चितवन । चितवनको नारायणगढमा बिहीबारदेखि अत्याधुनिक सुविधा सम्पन्न चलचित्र घर सञ्चालनमा आएको छ । डीसीएन जलमा प्रालिले पुरानो जलमा हल भएको ठाउँ लिलाचोकमा क्यूएफएक्स हल सञ्चालनमा ल्याएको हो । 

 

डिसिएन जलमा हल उद्घाटनको क्रममा चितवनका प्रमुख जिल्ला अधिकारी विनोद प्रकाश सिंहले मानिसलाई गास, बाँस र कपास जस्तै मनोरञ्जन पनि आवश्यक रहेको बताउनुभयो । मानिस स्वस्थ रहनको लागि मनोरञ्जनसमेत आवश्यक रहेको र अत्याधुनिक सुविधासम्पन्न हलहरुले मनोरञ्जनमा नयाँ आयाम थपेको प्रजिअ सिंहले बताउनुभयो । अत्याधुनिक हल सञ्चालनले सर्वसाधारणको स्तर र क्षमताअनुसार मनोरञ्जन पाउने सयम आएको उहाँले बताउनुभयो । नेपालमा स्तरीय चलचित्र निर्माण हुन नसकेको कारण हिन्दी चलचित्रमा भर पर्नुपरेको सिंहको भनाइ थियो । नेपालमा पहिलो पटक अत्याधुनिक चलचित्र निर्माण गर्दै आएको डिजिटल सिनेमा नेपालले हल निर्माणको लागि लागि आठ करोड रुपैयाँभन्दा बढी लगानी गरेको हलका अध्यक्ष एवम् चलचित्र निर्माता अशोक शर्माले बताउनुभयो ।

 

हलको साउण्ड सिस्टम र प्रोजेक्सनको लागिमात्र करिब साढे एक करोड रुपैयाँ खर्च भएको शर्माले जानकारी दिनुभयो । आफहरुले हल सञ्चालन गर्दा क्यूएफएक्सको गुणस्तरलाई कायम गर्नुपर्ने भएका कारण हल व्यवस्थापनमा बढी खर्च गरिएको शर्माले बताउनुभयो । उक्त हलमा शुक्रबार, शनिबार र सोमबार चार शोमा चलचित्र देखाइने शर्माले बताउनुभयो । 

 

शुक्रबार, शनिबार र सोमबार दर्शकले चलचित्र हेर्नको लागि दुई ५० रुपैयाँको टिकट काट्नुपर्ने तथा बिहानी शोमा ५० प्रतिशत छुटको व्यवस्था गरिने उहाँले जानकारी दिनुभयो । शुक्र, शनिबार र सोमबारबाहेकका दिनमा उक्त हलमा तीन वटा शो देखाइने तथा चलचित्र हेर्नको लागि तीन वटा शोको व्यवस्था गरिएको शर्माले बताउनुभयो । ‘“क्युएफएक्स जलमा हलमा राष्ट्रियताको नाममा झुर नेपाली चलचित्र प्रदर्शन गर्दैनौँ” शर्माले भन्नुभयो, “चलचित्र छनौट समितिले छानेको चलचित्र मात्र हामीले प्रदर्शनमा ल्याउनेछौँ, हलबाट हिन्दी र अङ्ग्रेजी गुणस्तरीय चलचित्र समेत प्रदर्शन गर्नेछौँ ।” 

 

हल उद्घाटनका क्रममा जलमा नारायणगढका निर्देशक वीरेन्द्र नारायण श्रेष्ठ, उद्योग वाणिज्य संघ चितवनका अध्यक्ष कल्याण जोशीलगायतले मन्तव्य राखेका थिए । यस चलचित्र भवनमा दुर्इ वटा हल रहेको छ जसमा ‘ए’ मा २६८ र ‘बी’ मा २६५ गरी कुल ५३३ सिट क्षमता रहेको छ ।